Miarritzek 40 minutu eman ditu esnatzeko eta galtzaile atera da

2010 molde txarrean agurtuko du Miarritzek. Montpellierren kontrako partidan, zortea aurka izan zuen. Partida hasi baino lehen Yachvili eta Afoa galdu zituen, eta azken unean Aiestaran eta Watremez zelairatu behar izan zituen Agilerako taldeak. Azkenean, elementu horiek ezin izan zituen gainditu, eta merezita galdu zuen Agilerako taldeak.

Montpellier Top 14ko bigarren postuan zela hasi zen partida. Etxeko taldeak ederki frogatu zuen ez zela kasualitatea sailkapenaren goiko aldean egotea. Lehen minututik presioa eman zion Miarritzeri, eta partida irabazteko merituak egin.

Alderantziz, Miarritzek lehen zatian galdu zuen atzoko norgehiagoka. Etxekoak kontzentratuta eta zentratuta sartu baziren partidara, miarriztarrak oraindik lotan eta Yachviliren hutsa nola bete jakin ezinda hasi ziren.

Lehen oren laurdenean, Montpellierrek 13-0eko partziala sartu zion Miarritzeri, eta partida erabakita utzi. Kolpea ematen lehena Martin Bustos Moyano izan zen. Argentinarrak atzo bere ostikada guztiak lortu zituen, Miarritzeren petoak aldi oro zigortuz. Ondoren, Trinh-Ducen baloi lapurreta eta entsegua etorri zen.

Lehen zatian, goitik behera agindu zuen Montpellierrek, eta , ederki merezita, 19-3koarekin joan zen aldageletara atsedenaldian.

Miarritzeren eskarmentua

Orduan, Jean Mixel Gonzalezek eskarmentuzko jokalariak zelairatu zituen, batik bat aitzinean. Hautua ona izan zen, 20 minutuz ez baitzuen gehiago punturik jaso Lapurdiko taldeak. Fernandezen txartel horiarekin batera, gainera, zuloa tapatzen hasi zen Peyrelongui eta Bolakororen entseguari esker: 19-13.

Baina berantegi zen jada, eta Montpellierek ez zion partidari ihes egiten utzi. Azken minutuan, Traillen drop bati esker, defentsako puntu gehigarriarekin itzuliko da Miarritze etxera.

Montpellier.. Figallo (Shvelidze, 30. min.), Ladhuie, Jgenti; Hancke, Fakate; Ouedraogo, Matadigo, Gorgodze; Tomas, Trinh-Duc (Rees, 66. min.); Bustos Moyano, Fernandez, Tuilevuka, Berard; Thiery (Sicard, 40. min.).

Miarritze. Watremez (Marconnet, 47. min.), Terrain (August, 47. min.), Johnstone (Barozzi, 47. min.); Lund, Taele (Thion, 66. min.); Vahafolau (Lauret, 76. min.), Hariñordoki, Faure; Aiestaran (Tranier, 42. min.), Peyrelongue; Gobelet, Traille, Bosch, Bolakoro; Haylet-Petty.

Markagailua. 3-0; 6-0; 13-0; 13-3; 16-3; 19-3; 19-6; 19-13; 22-13; 22-16.