Miarritzek partida zaila du Montpellierren

Gabon gaueko foie grasaren eta urtats gaueko xanpainaren artean, Miarritzek oso plater pisua jan beharko du arratsalde honetan. Sasoi honetako errebelazioa izaten ari den Montpellierren aurka jokatu beharko du Agilerako hamabostekoak. Talde sendoa da Montpellier, harrobi bikaina duena. Azken hiru sasoietan taldean egonkortu diren Tomas, Ouedraogo, Paillaugue eta Trinh-Duceni, oso fin dabiltzan Doumeyrou edo De Marco gazteak gehitu zaizkie. Gazte horiek zuzentzeko, gainera, esperientziazko bikotea dauka aulkian Montpellierrek: Eric Bechu eta Fabien Galthier teknikariak.

Norgehiagoka zaila izanen du, beraz, Miarritzek. «Bi lan saio izan ditugu bakarrik partida prestatzeko. Jokoa ederki eraiki dute sasoi honetan, eta osotasuna ikusten diet», adierazi du Jack Isaac Miarritzeko gibelekoen entrenatzaileak. Bigarren postua ez du kasualitatez lortu Mediterraneoko taldeak, Isaacen aburuz: «Aitzinean indartsu jokatzeko gai dira, eta fite, jokoa transformatzeko ere gibelekoekin. Teknikoki trebeak dira».

2011 oraindik iritsia ez bada ere, urtarril honetan erabakiko da Miarritzeren etorkizuna. Top 14an hiru partida bihurri ditu: bi bidaia Montpellierrera eta Toulonera, eta Agenen aurkakoa Agileran. Ondoren, Heineken Kopako final-laurdeneko sailkapena lortzeko partida erabakigarria jokatu beharko du Belfasten, Ulsterreko probintziaren aurka: « Presio anitzeko partidak izanen ditugu oso epe motzean. Ez dugu lasaitzeko paradarik. Anitz izanen dugu jokoan », onartu du Isaacek.

Panorama ikusiz, entrenatzaileek txandakatzeak egingo dituzte. Ngwenyak eta Thionek atseden izanen dute gaur, eta Touloneko partidarako gorde dituzte. Hamabostekoan sorpresa batzuk izanen dira ere: hegalean aspaldiko partez Jean-Baptiste Gobelet hasieratik ariko da. Barcellaren eta Coetzeeren hutsunea betetzera etorri da Afoa harroina, eta lehen partida izanen du gaurkoa xuri-gorriekin.

MONTPELLIER- MIARRITZE

Racing. Figallo, Ladhuie, Jgenti; Hancke, Fakate; Ouedraogo (kap.), Matadigo, Gorgodze; Tomas, Trinh-Duc; Bustos-Moyano, Fernandez, Tuilevuka, Berard; Thiery.

Miarritze. Afoa, Terrain, Johnstone; E. Lund, Taele; Vahafolau, Faure, Hariñordoki (kap.); Yachvili, Peyrelongue; Gobelet, Bosch, Traille, Bolakoro; Haylett-Pety.

Lekua. Montpellierko Du Manoir (15.000 ikusle).

Orena. 18:45 (Canal Plus Fr.).