Miarritzeri asko kostatzen ari zaio Top 14ko sasoiari neurria hartzea

Miarritze. Coetzee, Terrain (Hegi, 46. min.), Marconnet (Buckle, 65. min.); Thion, Roidot; M. Lund (Guyot, 10. min.), Lauret, Gray (Taele, 66. min.); Lesgourgues, Peyrelongue; Caprice, Gimenez (Bond, 71. min.), Burotu, Couet-Lannes; eta Balshaw.

Agen. Schwalger (Cabary, 65. min.), Najissi (Janaudy, 53. min.), Garcia (Sheklashvili, 63. min.); Senekal (O' Connor, 64. min.), Badenhorst; Monribot, Fono, Fonua (Lagrange, 36. min.); Dupuy (Bales, (53. min.), Barnard (Courrent, 58. min.); Coux (Petre, 20. min.), Pelesasa, Ahotaeiloa, Dulin; Tian.

Markagailua. 0-3, 0-6, 3-6, 6-6 (atsedenaldian); 9-6 eta 9-9.

Epailea. Pascal Gauzere.

Iragan astean Toulonen zelaian alde handiarekin galdu ondoren (30-5), Miarritzek irabazi gabe jarraitzen du ligan, atzo etxean Agenen aurka berdinketa lortu eta gero. Etxekoek ez zuten jauzi handirik egin sailkapenean, ez baitziren gai izan Ageni nagusitzeko. Hortzak erakutsi zituen aurkariak, baina ez zuen aparteko jokorik egin. Euriak nabarmen baldintzatu zuen lapurtarren eta Garonakoen arteko partida. Bezperako ekaitzak egoera txarrean utzi zuen berdegunea, eta baldintza horietan Miarritzek ez zuen jakin izan aitzineko jokalarien esperientzia inposatzen.

Agen hasi zen markagailuan aitzinetik lehen zatian, Par Barnarden bi zigor kolperi esker (0-6). Hala ere, atsedenaldira iritsi aurretik, Peyrelonguek errefera eman zion, eta azkenean berdinketarekin amaitu ziren lehen berrogei minutuak (6-6). Bigarren zatian Miarritzek intentzio gehiago erakutsi zuen, eta baloia gehiagotan izan zuen esku artean. Horri esker, 9-6 ezarri zen aurretik. Baina Taelek txartel horia ikusi eta gero, Agenek partida berdintzea lortu zuen. Azken minutuan Courrent zigor kolpea sartzen saiatu zen, baina, zorionez, ez zuen asmatu, eta Miarritzek, gutxien-gutxienez, berdinketari eutsi zion.

Baionak 18-6 galdu du

Hutsune asko zeuzkan atzo Baionak Bordeleri aurre egiteko, eta lapurtarrek amore eman behar izan zuten. Bi zigor kolpe sartuta, 9-6 amaitu zen lehen zatia, baina bigarren zatian nabarmen hobeak izan ziren etxekoak. 18-6 amaitu zen azkenik partida.