Athleticek eman du berria: Iker Muniainek taldean jokatuko du aurrerantzean ere; gutxienez, 2024ko ekainera arte. Kontratua berritu du, eta, horrez gainera, iragarri dute ez dutela etete klausularik jarriko kontratuan. Hau da, "diru kopuru bat ordainduta [kontratua] aldez aurretik iraungitzeko aukera ezabatzea adostu dute" Muniainek eta Athleticek.
Denboraldi amaieran bukatzen zitzaion kontratua futbolariari, eta denbora eman du taldearekin negoziatzen. Erdilariak irailean esan zuenez, "oso zoriontsu" zen Bilbon, eta, azkenaldian zenbait jokalari garrantzitsuk taldea utzi ondoren, "poz baten beharrean" zirela jarraitzaileak.
Muniainek berak prentsaurrekoa emango du ostegunean, Lezaman, entrenamenduaren ostean.
