Murray ere, lehiatik at

Rafa Nadal, Roger Federer, Andy Murray eta Novak Djokovic. Lau jokalariok ziren Roland Garroseko lehen lau zerrendaburuak, finalerdietara iristeko hautagai nagusiak. Lau horietatik, ordea, Federerrek bakarrik lor dezake finalaren atarikora iristea, beste hirurek espero baino lehenago geratu baitira lehiatik kanpo. Djokovicek final-hamaseirenetan esan zuen agur, Nadalek final-zortzirenetan eta Murrayk final-laurdenetan. Britainiarra izan da, beraz, azkena. Fernando Gonzalez txiletarrak kanporatu zuen atzo (3-6, 6-3, 0-6 eta 4-6).

Gonzalezek Robin Soderling izango du aurkari finalerdietan. Suediarrak Nadal kanporatu izana ez zela kasualitatea izan erakutsi zuen atzo. Nikolai Davidenko errusiarrari irabazi zion, eta finalerdietarako sailkatu zen (6-1, 6-3 eta 6-1). Emaitzak ez du zalantzarako izpirik uzten, Soderling hasi eta bukatu nagusitu baitzen. Zortzigarren garaipena du jarraian suediarrak, Munduko Kopan lortu zituen hiru eta Parisen bost. Sasoiko dago.

Federerrek gaur du aukera finalerdietarako sailkatzeko. Gael Monfils etxeko jokalariren aurka ariko da. Final-laurdenetako beste partida Juan Martin del Potro argentinarrak eta Tommy Robredo kataluniarrak jokatuko dute.

Safina eta Cibulkova, aurrera

Emakumezkoetan, berriz, ez zen ezustekorik izan, eta Dinara Safina errusiarra, lehen zerrendaburua, finalerdietarako sailkatu zen atzo, Victoria Azarenka bielorrusiarrari 1-6, 6-4 eta 6-2 irabazi ondoren.

Arazo gutxiago izan zituen Dominika Cibulkovak. Eslovakiarrak astindu gogorra eman zion Maria Sharapova errusiarrari (6-0 eta 6-2). Sharapovak, beraz, ez du itzulera gozorik izango.

Final-laurdenetako beste bi partidak gaur jokatuko dira. Lehenbizikoan, Sorana Cirstea errumaniarra eta Samantha Stosur australiarra izango dira aurrez aurre, eta bigarrengoan, Svetlana Kuznetsova errusiarra eta Serena Williams estatubatuarra.