NBAk betoa jarri dio Pau Gasolen talde aldaketari

Osteguna bukatu eta ostirala hastear zenean hartu zuen indarra berriak. Los Angeles Lakersek New Orleanseko Chris Paul joko antolatzailea lortzeko mugimendua gauzatu zuen, eta, trukean, Pau Gasol eta Lamar Odom galdu. Bide batez, Houston Rockets ere jokalari mugimenduan sartzen zen, eta Pau Gasol lortu, Luis Scola, Kevin Martin eta Goran Dragic New Orleansera bidaltzearen truke.

Berriak aspaldi ez bezalako harrabotsa sortu zuen NBAn, baina ordu gutxiren buruan bertan behera geratu zen Lakersen ustezko mugimendu perfektua. New Orleans porrot ekonomikoak jota dago, eta NBAk kudeatzen du; jabetza NBAko talde guztietako ugazabek partekatzen dute. Cleveland Cavaliersen jabe Dan Gilbert-ek gidatu zuen kexa, argudio honekin: «Ez da posible talde batek jokalari aldaketa bat egin, 40 milioi dolar aurreztu, eta, gainera, talde guztiek nahi duten jokalaria bereganatzea [Chris Paul]. Hori iruzur larria da».