Aldaketa izan da Gipuzkoa Basketen. Donostia aldean Bartzelonara begira daude denak, ACB liga batzarra egiten ari delako Kataluniako hiriburuan, eta, ondo bidean, bertan jakinaraziko dutelako Gipuzkoa Basket ACB ligako taldea dela. Albiste horien zain, klubak ohar bidez jakinarazi du Nekane Arzallus dela presidente berria. Alvaro Bilbao egon da kargu horretan azken hiru urteotan, baina, "arrazoi profesionalak tarteko", pauso bat atzera ematea erabaki du.
2007ko ekainean iritsi zen Bilbao Gipuzkoa Basketera, kontseilari gisa, eta Miguel Santos eta Gorka Ramonedaren presidenteorde izan zen gero. 2012an Ramonedak kargua utzi zuenean, orduan bihurtu zen Bilbao GBCko presidente. Arzallus ere 2007an iritsi zen GBCra, eta presidenteorde kargua bete du azken hiru urteotan. Klubaren aro modernoko laugarren presidentea izango da Arzallus, lehen emakumezkoa.
