Askasibarrek azaldu zuenez, osotasunean bat egin dute jokalariek egindako adierazpenekin. «Gabonetako partidaren helburu bakarra ekonomikoa da. Bere garaian izena jarri zuten eragozpen, baina jokalariek ere adierazi dute hori ez dela arazoa edo blokeoaren arrazoia».
ESAITen aburuz, arazoa politikoa da. «PPk eta PSOEk bat egin dute euskal izaera zapaldu eta espainiar nortasuna inposatzeko». Gobernuaren akordioei men egiteagatik egoeraren erantzule egin dute Euskadiko Futbol Federazioa (EFF). «Euskal selekzioak lortzea oztopatzen eta euskal izaera ukatzen dutenei alfonbra gorria jartzen ari dira». Horregatik, inoiz baino garrantzitsuagotzat jo du selekzioen ofizialtasuna eskuratzeko elkarlana bultzatzea, bai kirolariak, bai klubak, bai instituzioak eta bai gizartea bera ere. «Herri oso baten etorkizuna dago jokoan; erronkak merezi du, eta lortuko dugu».
Desadostasunean, ados
Futbol jokalarien arabera, EFFk Arabako, Bizkaiko eta Gipuzkoako kirolariak bakarrik hautatzen dituenez, ez du Euskal Herria aintzat hartzen. Partida jokatzeko erabakiari «etikoa» iritzi dio Martxel Toledo ESAITeko ordezkariak. «Guk esaten genuena jokalariek berretsi dute». Toledoren ustez, EFFk ez du borondaterik Euskal Herria parametrotzat hartuta ofizialtasunerantz urratsak egiteko. Hori dela eta, hurrengo pausoak futbolariek irekitako bidetik eman behar direla uste du Toledok. «Jokoan ez dago partida bera, nazioartean Euskal Herriak selekzio gisa jokatzea baizik».
Abenduan zer eta nola egin aztertzen ari badira ere, zelaian eta zelaitik kanpo urratsak egiteko prest daudelako babestuko ditu jokalariak ESAITek. «Federazioko buruekin Euskal Herriak etorkizunean ofizialtasuna lortzeko ez du inolako aukerarik». Hargatik azpimarratu dute, selekzio propioa izateko beste egitura politiko baten beharra dagoela.
«Aitzakiek ez dute jada balio». ESAITekoen hitzetan, amaitu dira izenaren aldaketaren eztabaida ireki zutenek euskal selekzioa aitortzekoproposatutako aukerak. «Ezin gara beti aldarrikapen horietan geratu, eta zain egon. Ezinbestekoa da urratsak egitea».
Euskal selekzioaren aurkaria nor izango den ez dute aurreratu. Bai, ordea, abenduaren 28a selekzioaren aldeko aldarrikapen eguna bihurtzeko asmoa dutela. Aldaketen artean eskatu dute zazpi euskal lurraldeetako jokalariak bilduko dituen selekzioaren ofizialtasuna lortzea. Edo, munduko beste edozein futbol jokalarik bezala, zein selekziotan jokatu erabakitzeko eskubidea izatea.
Abenduaren 28ko prestaketa lanak abian daude. Ofizialtasuna, jokoan. Eskaera eta aldarrikapenak zelaian daudela, denborak erabakiko du euskal selekzioaren aldeko eta kontrako zatien emaitza.
