Ez zen izan Real Madrilen eguna atzokoa. Oker hasi zuen Borussia Dortmunden aurkako neurketa, 19. minutuan Sami Khedirak zelaia utzi behar izan baitzuen, min hartuta. Ordu laurden geroago, berriz, Pepek baloia oparitu zion Goetzeri, eta haren pasea ezin hobeto baliatu zuen Lewandoskik lehen gola sartzeko. Etxekoen pozak, ordea, bi minutu eskas iraun zuen, Cristiano Ronaldok Oezilen pase bikaina baliatu eta Weidenfellerren gainetik baloia loratuta berdinketa lortu zuen arte.
Portugaldarren golak oker hasitako partida zuzendu zuen. Bazirudien berriz ere Real Madrilek atzetik aurrera eginez irabaziko zuela. Manchester Cityren aurka egin zuen lehen jardunaldian, eta atzo ere hori egin zezakeenaren itxura eman zuen berdinketaren gola sartu ondorengo minutuetan. Baina ez. Ez zen horrelakorik gertatu. Aitzitik, kolpea eman beharrean, kolpea jaso zuen Real Madrilek. Schmelzerrek aldaratze bat jaso zuen arearen ertzean, eta haren jaurtiketa sareetara joan zen. Gol horrek eman zion garaipena Borussia Dortmundi, eta D multzoko lehen postua.
Ezustea Amsterdamen
Multzo berean, Ajaxek 3-1 irabazi zion Manchester Cityri Amsterdamen. Ingalaterrako taldea multzoko azkena da orain, puntu bakarrarekin. Miraria behar du sailkatzeko.
Oker hasi, okerrago amaitu
Borussia Dortmundek Real Madrili irabazi, eta lider jarri da D multzoan; Manchester Cityk ia ez du aukerarik
Iruzkinak
Ez dago iruzkinik
Ordenatu
