Olaizola II.a eta Beroiz ere sanmateoetako finalean ariko dira, bihar

Gutxienez hamabi tanto egin beharra zeuzkaten finalean egoteko. Baina pilotari guztiei gustatzen zaien moduan lortu zuten atzo Olaizola II.ak eta Beroizek Sanmateoetako biharko finalerako txartela: partida irabazita. Joan den igandean 5-22 irabazi zieten Asegarcekoek Berasaluze VIII.a eta Beginori, eta atzo ere erraz antzean nagusitu ziren.

9-9kora arte parekatua izan zen partida, baina irabazleek 0-10eko partziala lortu zuten (9-19). Beroizek kontrolpean izan zuen atzean Zubieta, eta Olaizola II.a jolasean ibili zen aurrean. Titin III.aren erreakzioa tartean, azkenerako 16-22 amaitu zen partida. Irabazleek Irujo eta Merino I.aren aurka jokatuko dute bihar finala.