Orica-Greenedgek irabazi du Italiako Giroko lehen etapa. Bi segundoko aldea atera dio Omega-Pharmari Belfasteko (Irlanda) kaleetan barrena jokaturiko 21 kilometroko erlojupeko proban. Lehen maglia arrosa Svein Tuftek jantzi du, gaur 37 urte bete ditu eta taldeak opari polita egin dio. Dena den, irabazlea bainoago, albistea galtzailea izan da. Galtzaile handia egon baita: Dan Martin (Garmin). Taldeak erorikoa izan du eta Martinek proba bertan behar utzi behar izan du lepauztaia hautsita. Irlandarra itzulia irabazteko hautagaien artean zegoen.
Faboritoen arteko lehian Rigoberto Uranek (Omega) eta Cadel Evansek (BMC) —3., 7 segundora— lortu dituzte markarik onenak. Besteak beste, 18 segundo atera dizkiote Rafal Majkari (Saxo); 50 Nairo Quintanari (Movistar); 53 Ivan Bassori (Cannondale) eta 1.33 Joaquim Rodriguez (Katuxa).
