Ezin izan zuen Oriok atzo jaitsiera saihestu eta erabaki administratiborik ezean, datorren urtean KAE 1 Ligan lehiatuko dira oriotarrak. Denboraldi txarra egin dute aurten. Herenegun etxean azken sailkatu ziren oriotarrak, eta atzo denboraldiko estropada onenetako bat egin arren (zazpigarren izan ziren Castro-Urdialesen, Flaviobriga Banderan), ez zuten Camargorekiko behar zuten aldea lortu.
Ondorioz, Orio jaitsi egin da, eta Camargok San Miguel Ligari eusteko kanporaketa jokatuko du. Hala ere, TKEk Urdaibairekin Estrobo auzia dela eta zer egin erabaki ez duenez, Oriok ere jokatuko du mailari eusteko kanporaketa, eta Urdaibai erabaki administratibo batekin jaistera zigortuko balute, Camargok mailari eutsiko lioke, eta Oriok kanporaketan mailari eusteko aukera izango luke.
Kaikuk eskura du San Miguel Liga
Atzoko estropada Kaikuk irabazi zuen, Urdaibai bigarren sailkatuari 11 segundu ateraz. Sestaotarrek nahikoa dute San Miguel Liga amaitzeko geratzen diren estropadak amaitzea txapelketa irabazteko, hemezortzi puntuko aldea baitute sailkapen nagusian.
