Azken urteetan, bide beretik doa KAE 1 liga. Ontzi bat edo bi beste guztien gainetik ibiltzen dira, eta lehen postua lortzeko borrokak emozio gutxi izaten du. Aurten ere horrela dira gauzak, Orio beste denak baino gehiago delako. Lau estropada egin dituzte, eta lauretan, oriotarrak nagusi. Gaur, bosgarrena dute jokoan Getarian (Gipuzkoa), eta ez da ezusterik espero.
Beste urteetan bezala, zirrara bigarren postua lortzeko borrokan dago. Estu daude gauzak Santurtziren eta Elantxoberen artean, eta Isuntza ez da urruti. Bizkaitarren arteko onenak saria izango du liga amaieran, San Miguel ligara igotzeko kanporaketa jokatuko baitu. Santurtzi dator behetik gora, eta asteazkenean, lan biribila osatu zuen Bizkaiko txapelketan; laugarren izan zen, liga bat gorago duen Zierbena aise gaindituta, eta Portugaletetik oso gertu.
Jaitsierako lekuetan ere larri dira kontuak. Deustua azkena; aurretik ditu Hondarribia eta Santoña, hiru puntuan.
KAE 2koak, Getxon
Eguneko lehen estropada Getxon izango da (12:00). KAE 2 ligakoak lehiatuko dira, zazpigarren jardunaldian. Trintxerpe eta Orio B dira faboritoak, haien artean banatu dituztelako bandera guztiak. Pasaitarrak doaz lehen postuan, eta Orio B bigarren da, bi puntura.
Oriok KAE 1 ligako bosgarren estropada jarraian irabazi nahi du gaur
Getarian izango da bosgarren jardunaldia, eta lehia handia bigarren lekurako espero da
Iruzkinak
Ez dago iruzkinik
Ordenatu
