Osasunaren altxortegitik 2,4 milioi euro nora bideratu ziren ikertzen ari den epaile instruktoreak sekretupetik atera du diligentziaren zati handi bat. Dokumentazio horren arabera, iazko denboraldian Osasunak hiru partida erosi zituela froga ditzaken aztarnak aurkitu ditu. Zehazki, Espanyoli berdinketa egiteagatik 250.000 euro eman zizkion zantzuak dauzka epaileak, eta Betisi 650.000 euro. Azken honi bi partidaren truke eman bide zion dirua; Valladolidi irabazteagatik eta Osasunaren kontrako partidan galtzeagatik.
Bere zantzuak indartzeko, epaileak dio faltsua dela 2013ko ekainean Portugalgo Flefield higiezin enpresari ustez ordaindutako 900.000 euroko faktura.
Partida horiez gainera, beste zenbait partida ere ikertzen ari da epailea. Halaber, esku-dirutan eginiko ordainketa gehiago ere ikertzen ari da.
Osasuna auzian 21 lagun daude inputatuta. Tartean dira Osasunako azken bi presidente ohiak, gerentea eta zenbait jokalari. Haietako hainbat atxilotu zituzten martxoan.
Beste bi ikerketa abian
Auzi nagusiarekin batera, epaileak beste bi atal ireki ditu Osasun auziarekin lotuta. Atal horietako batean Patxi Izko presidente zen garaiko zenbait diru mugimendu ikertuko ditu. Zehazki, 2003-2007 urteen artean klubaren kontuetatik esku-dirutan ateratako 3 milioi euroren erabilera ikertuko du.
Ikerketa honen harira Patxi Izko inputatu egiten duela ebatzi du epaileak.
Beste ikerketa bidea, Miguel Artxanko presidete ohiari buruzkoa da. Presidentzia utzi baino aste gutxi batzuk lehenago bere zenbait ondasun emaztearen eta seme-alaben izenean jarri izana ikertuko du epaileak.
