Parez pareko aurkaria izango du gaur Anaitasunak

Anaitasunak Puerto Sagunten aurkako partida jokatuko du gaur arratsaldeko zazpietan, Arrosadia pabiloian. Berdintasun handiko partida izango da, ziurrenik, bi taldeak puntuz berdinduta baitaude sailkapen orokorrean; sei jardunaldi jokatuta, bina puntu dituzte. Hamabosgarren postuan dago Iruñeko taldea, eta hamahirugarrenean Valentziakoa (Herri Katalanak). Bigarren Mailan makina bat aldiz indarrak neurturikoak dira, eta ondo ezagutzen dute elkar.

Bi taldeek helburu bera dute: mailari eustea. Horregatik, ezinbesteko partidak dira aurkari zuzenen kontra jokatzen diren horiek, hortxe hauts baitaiteke oreka. Nafarroako taldea horren jakitun da; eta lehen jardunaldiaz geroztik partidarik irabazi gabe dagoenez, irabazteak konfiantza emango lioke. Matias Schulz, Maxi Cancio eta Jose Luis Garcia ezin izango dira aritu: Schulz argentinarra, selekzioarekin dagoelako, eta Cancio eta Garcia, min hartuta daudelako. Rolanas Bernatonisi, berriz, sendatu zaio aurreko partidan izandako gainkarga.

Puerto Saguntek partida bakarra irabazi du. Iragan asteburuan lortu zuen estreinako garaipenhori, Logroñori etxean irabazita. Beraz, konfiantzaz beteta ariko dira valentziarrak. Dena den, min hartuta dauden jokalari asko ditu Goran Dockic entrenatzaileak. Besteak beste, Nacho Nebotek eta Marko Dzokicek ezingo dute jokatu. Zalantzan dago Iago Muiña eskuin albokoa ariko den. Arazo horiei taldeak duen jokalari eskasia gehitu behar zaio. Era berean, nabarmentzekoa da Sagunten Anaitasunako hiru jokalari ohi daudela: Muiña bera, Chelu Cideta Adrian Sifre.

Zaleen eguna

Arrosadia pabiloia leporaino beteta izango da, eta ez da girorik faltako. Taldeak garai latza du, eta animazio ekitaldiak antolatu dituzte; besteak beste, txaranga bat egongo da harmailetan. Anaitasunaren zaleek taldearen zale elkartearen egoitzan elkartuko dira (12:30), bertan herri bazkaria egin eta kalejira giroan pabilioira joateko.