Ezin asma zitekeen nork irabaziko zuen azken minutura arte. Berdindua joan da partida bukaera arte: bana, launa, seina, zazpina eta 21na berdindu dute bi bikoteek. "Ezin dut sinetsi irabazi dugunik", zihoen Elezkanok lehia amaitutakoan.
Berdinduta, baina Altuna eta Martijaren atzetik joan dira Elezkano eta Rezusta 8-12ra heldu arte. Une horretan atsedenadia eskatu dute, eta hortik aurrera, tantaz tanta bada ere, markagailuari buelta ematea lortu dute.
Larri heldu dira, dena den, bi bikoteak azken tantora. Azken pilotakadaraino borrokatu dira lau pilotariak, eta finalerako txartela bikote bakarrarentzat izan bada ere, biek merezi izan dute garaipena.
Bi aste barru jokatuko da finala, eta Zabaleta-Ezkurdia eta Elezkano-Rezusta izango dira aurrez aurre.
