Tropela bi hutsune nabarmenekin abiatu da gaurko etapan: Michael Matthewsek (Sunweb), gaixorik, eta Tiesj Benootek (Lotto Soudal), min hartuta, Tourra utzi behar izan dute. Etapak ohiko joera izan du lehen kilometroetan. Lilian Calmejane (Direct Energie) izan da erasoa jo duen lehen txirrindularia. Hari beste sei batu zaizkio: Sylvain Chavanel taldekidea, Elie Gesbert (Fortuneo), Julien Vermote (Dimension Data), Jasper de Buyst (Lotto Soudal), Toms Skujins (Trek) eta Nicolas Edet (Cofidis). Lau minututik gorako aldearekin ibili dira. Lehen 100 kilometroak eginda, hasi dira txirrindulariak muinoetan gora eta behera. Lehen igoera puntuagarrian aurrera egin du Chavanel beteranoak puntuen bila. Direct Energie taldeak ihesaldian izan dituen bi txirrindulariak baliatu nahi izan ditu mendiko mailota jantzi eta podiumera igotzeko. Bien bitartean, tropelean Bora taldea erritmoa gogortzen hasi da. Mark Cavendish (Dimension Data) eta Marcel Kittel (Katusha) izan dira atzean gelditu diren bi txirrindulari esanguratsu. Ihesaldian zihoan Gesbertek erorikoa izan du eta tropelak irentsi du. Calmejane eta Chavanel buru belarri saiatu dira mendiko mailota eskuratzeko, baina Skujins indartsuago izan da eta bera igo da podiumera.
Julian Alaphilippek (Quick-Step) helmugatik 12 kilometrora zegoen gainsariaren bila egin du salto tropeletik. Hiru segundo bereganatu ditu frantziarrak eta bi van Avermaet liderrak. Azken segundoa Calmejanerentzat izan da. Hor amaitu da ihesaldia. Orduan Rein Taaramek (Direct Energie) jo du erasoa. Berehala jarri da Sky pelotoitik tiraka egoera kontrolatu eta Chris Froome babesteko. Egan Bernal eta Froome (Sky) sartu dira buru-buruan azken kilometroan. Malda hasi eta berehala erasoa jo duena Philippe Gilbert (Quick-Step) izan da. Julien Simon (Cofidis) eta Greg Van Avermaetek (BMC) joan dira haren gurpilera. Bitartean, babesean zeuden Sagan, Colbrelli eta Alaphilippe. Van Avermaetek urrundik hasi du esprinta eta luze egin zaio. Saganek eta Colbrelli izan dira parez pare une batez, baina munduko txapelduna nagusitu da. Peter Saganen bigarren garaipena aurtengo Tourrean. Lider van Avermaetek jarraitzen du.
Mikel Landa arazorik gabe sartu da tropel nagusian. Gainontzeko euskal txirrindulariak ez dira esprintean izan eta denbora galdu dute.
