Ez da polemikarik izan lau eta erdiko txapelketaren finalerako pilota aukeraketan. Altuna eta Urrutikoetxea finala hartuko duen Bilboko Miribilla pilotalekuan elkartu dira, txapela eskuratzeko komeni zaien materialaren bila, eta biak konforme agertu dira aurkitu dutenarekin.
Altunaren esanetan, Urrutikoetxeak aukeratu dituen pilotak "biziagoak" dira, berak hautatutakoen aldean. Nahi zuen materiala aurkitzea kosta egin zaiola adierazi du, baina azkenean aurkitu du, eta gustura agertu da. Urrutikoetxeari, berriz, politak iruditu zaizkio bereak eta Altunarenak.
Bizkaitarra da finalerako faborito nagusia, eta, ondorioz, dirua haren alde izango da partidaren hasieran. 100 60ri irtengo da dirua. Urrutikoetxea faborito izateak ez du Altuna harritu, eta hala izatea ulertzen duela ziurtatu du.
Urrutikoetxeak min hartu zuen behatzetako batean final laurdenetako ligaxkako azken partidan, eta min hori erabat osatu gabe jokatu zuen finalerdietan. Finalean, behatz bana babestuko du esku bakoitzean.
Altunaren eta Urrutikoetxearen arteko neurketak ikusmin handia piztu duela nabarmendu dute enpresek. Miribilla bete egingo da, eta aurreko finaletan baino azkarrago saldu dira sarrerak, antolatzaileen esanetan. Beste 200 edo 300 sarrera ere salduko liratekeela adierazi dute.
[youtube]https://youtu.be/8oDCdAMon6g[/youtube]
