Pineau garaile Giroan

Jerome Pineauk (Quick Step taldea) irabazi du gaur 93. Italiako Giroko bosgarren etapa -Novara-Novi Ligure, 162 kilometro–, 18. kilometroan hasi den ihesaldia helmugaraino iritsita. Julien Fouchard eta Yukiya Arashiro iheskideei aurrea hartu die esprintean. Tropela lau segundora heldu da, Tyler Farrar buru zuela.

Vincenzo Nibalik segitzen du lider, eta ez da aldaketarik egon sailkapen nagusiko aurreko beste postuetan.

Bihar korrituko dute seigarren etapa: Fidenza-Carrara (172 kilometro). Hiru mendate izango dituzte. Haietako aurrena erdialdera egongo da, batez beste %5eko maldarekin; bigarren mailakoa da. Besteak hirugarren mailakoak dira; azkena, helmugatik 11 kilometrora.

Maiatzaren 30ean amaituko da Giroa, Veronan, 15,3 kilometroko erlojupekoarekin. Giroan zehar mendiko sei etapa egongo dira.