Portlandek sufritu egingo du

Urtebete eskas joan da Wisla Plock utzi nuenetik, eta aldaketak izan dira ordutik. Lehena, entrenatzailez aldatu dutela: Krzystof Kiesel, taldeko eta selekzioko jokalari ohia. Defentsa gogorra (5-1 sistema) oso gustuko du, eta kontraerasoan azkar ateratzea. Hori egiteko jokalari aproposak ditu: Niedzielski eta Paluch ezker eta eskuin hegalekoak. Jokalari oso onak dira biak, eta azkarrak. Maiz jokatzen dute selekzioarekin, eta eskarmentu handia dute. Wleklak erdikoa ere oso kontuan hartzeko jokalaria da. Beste jokalari guztiak baino eskarmentu handiagoa du, eta ohituta dago tituluak irabaztera. Defentsan lan bikaina egiten du aurreratu bezala, eta erasoan ere ondo moldatzen da. Gogorra eta borrokalaria, taldearentzat jokalari oso garrantzitsua da.

Erasoan, zabal jokatzen dute, eta gehienetan hegalekoek bukatzen dute jokaldia. Pibotea ere ez dute begiz galtzen, eta ahal dutenean barrura ematen dute pasea, Wleklakek batez ere. Albokoak ere ezin dira ahaztu: Zolotenko ezkerrean eta Titov eskuinean. Azken hau arriskutsua da egun ona izanez gero. Erasoan bakarrik jokatzen du, eta jaurtiketa ona du, oinak lurretik altxa gabe bereziki. Atea ere ondo zainduta dago, hiru atezain seguru baitituzte.Etxean eta etxetik kanpo berdin jokatzen dute, baina etxean askoz arriskutsuagoak dira. Pista txikia da, eta lepo betetzen da. Zaleek atseden gabe animatzen dute, eta presio handia eragiten dute. Aurkariak, txikiak zein handiak, apur bat izutzen dira Plocken jokatzen dutenean. Etxetik kanpo, berriz, konfiantza gutxiagorekin aritzen dira, eta taldearen maila jaisten da.Borrokarako grina eta gogo bizia, hori da Wislak duen onena. Ez dute inoiz amore ematen, lehen minututik azkenera egiten dute borroka. Ahulune nagusia, berriz, kanpoko jaurtiketa falta da. Lehen lerroa bigarrenaren azpian geratzen da askotan. Portland da faborito, baina Plocken sufritu egingo dute, ziur. Adi-adi jokatu ezean, arazoak izan ditzakete. Ez baztertu Wislak gaur ezustekoa ematea.