Gauza jakina zen pasioz betea izango zela atzo Miarritzek eta Baionak atzo jokatu zuten derbia, eta nabaria zen horrek hainbat osasun protokolo hausteko arriskua zekarrela ere. 5.000 lagun bildu ziren Aguilera estadioan, Miarritzen, eta, besteak beste, zaletuek alkohola sartu zuten estadiora eta zelaira salto egin zuten neurketaren amaieran. Hori dela eta, Pirinio Atlantikoetako prefetak ikerketa zabaltzeko agindu dio Baionako prokuradoreari.
Hark igorritako oharrak dioenez, Miarritzeko Olympique taldearen ardura zen ezarritako neurriak betearaztea, eta haren aurkako neurriak har ditzaketela jakinarazi du.
Bo igotzen Baiona jausten pic.twitter.com/tjvuStqWm4
— Euskal Irratiak (@euskalirratiak) June 12, 2021
Neurriak, izatez, estuak ziren: zelaira sartzeko zaleek txertatze ziurtagiria edo COVID-19aren test batean negatibo eman zutela adierazten zuen dokumentu bat aurkeztu behar zuten. Hortaz gain, Miarritzeko eta Baionako zaletuek gune bana zuten, eta ezin zuten handik mugitu.
Tabernetan, berriz, debekatu egin zuten neurketa botatzea, eta estadiora joan ezin izan zuten zaleek etxean ikusi behar izan zuten. Kalean ere baziren segurtasun neurriak: ezin zen alkoholik edan arratsaldeko 16:00etatik aurrera.
Miarritze, Top14ra
Neurketari dagokionez, Miarritze izango da datorren sasoian Top14an jokatuko duena; Baionak, aldiz, PRO D2an jokatuko du, koska bat beherago. Penalti jaurtiketetan nagusitu ziren etxekoak (6-5), Baionako Aymeric Lucek berea huts egin zuelako. Erabat parekatua izan zen partida: seina bukatu zuten, eta puntu guztiak zigor kolpeen bitartez lortu zituzten bi taldeek.
