Espero bezala, Tony Martinek (Omega) irabazi du Espainiako Vueltako 10. etapa, 36,7 kilometroko erlojupekoa (47.02 minutu), Fabian Cancellarari (Trek) aurrea hartuta —11 segundo atera dizkio—. Etapako lehia izan da hori, baina are ikusgarriagoa izan da sailkapen nagusiko borroka. Nairo Quintana (Movistar) erori egin da Moncayon behera, kolpe handia hartu du kolonbiarrak, eta denbora asko galdu du helmugan: 4.07 Tony Martinekiko. Une batean lurrean etzanda geratu da gaur arteko liderra, baina erlojupekoa amaitu ahal izan du azkenean.
Gainerako faboritoen artean Rigoberto Uran (Omega) ibili da harrigarri, helmugan hirugarren denborarik onena lortuta (47.17). Oso saio ona egin du Alberto Contadorrek (Tinkoff), irabazlearengandik 39 segundora; dotore ibili da Samuel Sanchez (BMC), 48 segundo galduta; 1.01 galdu du Alejandro Valverdek (Movistar); 1.32 Chris Froomek (Sky); 1.49 Joaquim Rodriguezek (Katuxa); eta 2.03 Fabio Aruk (Astana).
Sailkapen nagusian Contador jarri da lider. 27 segundora dago orain Valverde, 59ra Uran, 1.12ra Winner Anacona (Lampre), 1.18ra Froome, 1.37ra Joaquim Rodriguez, 1.41era Samuel Sanchez eta 3.25era Quintana. Iruñean hasi eta Aralarko Done Mikel santutegian amaituko da biharko etapa, 153,4 kilometrokoa.
