Zalantzaren bat zeukanarentzat, azken kolpe erabakigarria eman du Nairo Quintanak (Movistar). Monte Grappako kronoigoera gogor-gogorra irabazita, behetik gora eginda irabaziko du kolonbiarrak Giroa. Txakalaldi ikusgarriren bat eduki beharko luke bihar Movistarreko taldeburuak etzi Triesten podiumeko koskarik altuenera ez igotzeko. Beldurgarria da biharko etapa amaiera, Passo del Pura lehen mailakoa, Sella Razzo bigarren mailakoa, eta Zoncolan lehen mailakoa igo beharko dituztelako. Baina 3.07 minutura dauka jada Rigoberto Uran (Omega) bigarren sailkatua, eta 3.48ra Fabio Aru (astana) hirugarrena.
Azken horrek eman du erakustaldi bikaina kronoigoeran, Quintanaren atzetik bigarren denborarik onena lortuta, eta 1.38ra urrundu du Pierre Rolland (Europcar) podiumerako lehian. Atzera begira ez, aurrera begira ekingo dio Aruk biharko etapari, 41 segundora daukalako Uran. Domenico Pozzovivo (Ag2r) dago orain bosgarren, Quintanarekiko 6.16ra, Rafal Majka (Tinkoff) seigarren, 6.59ra, eta Cadel Evans (BMC) zazpigarren, 9.25era.
