Harrigarria izan da Emakumeen Birako lehen etapan Rabobank taldeak izan duen nagusitasuna. Ez indar neurketarik, ez zaintzarik, eta ez indar gordetzerik. Espero zen bezala, Zumeltza Ganek eta Urkiolak hautsi egin dute tropela, eta hamabi txirrindulariko taldetxo bat sortu da aurrean. Garaipenaren borroka euren arteko lehia izango zela zirudienean, helmugara iristeko hamabost kilometro falta zirela erasoa jo dute Pauline Ferrand Prevot, Anna Van der Breggen eta Marianne Vosek, Rabobankeko hiru txirrindularik, eta elkarrekin iritsi dira Iurretako helmugara. Vosek, zintzo, taldekideei utzi die garaipenaren lehia. Ferrand Prevot lider dela, Rabobankek esku-eskura dauka Birako garaipena, hirukoak minutu bateko aldea atera diolako zortzi txirrindulariko taldetxoari.
Bigarren taldetxoko esprintean Lizzie Armitstead (Boels Dolmans) izan da azkarrena, Annemiek Van Vleuten Rabobankeko laugarren txirrindulariari aurrea hartuta. Sailkapen nagusian Ferrand Prevot dago lider, lau segundora dago Van der Breggen, bostera Vos, eta 1.09ra Armitstead buru duen zazpi txirrindulariko taldetxoa. Ane Santesteban (Ale Cipollini) da lehen euskalduna, 2.56ra. Bihar Oñatin hasi eta amaituko da Birako bigarren etapa, 113,7 kilometrokoa.
