Reala-Athletic, denboraldiko hirugarren derbia jokatuko da gaur Zubietan

Derbi beroa jokatuko dute gaur Realak eta Athleticek Zubietan, Z7 zelaian (12:00). Beroa, zuri-gorriak Superligako lehen postuan daudelako, joan den astean Atletico Madrili 4-0 irabazita. Eta beroa, lehen fasean elkarren aurka jokatutako bi partidetan txuri-urdinek lau puntu eskuratu zituztelako: Lezaman 1-2 irabazi zuen Realak, eta Zubietan 1-1 amaitu zen partida. Lehen fase hori puntu kopuru berberarekin amaitu zuten bi taldeek, baina Realak gol aldeari esker lortu zuen lehen postua. Hori bai, bigarren fase honetan kolpe gogorra jaso berritan daude donostiarrak. Joan den astean, artean partidarik galdu gabe, konfiantzaz gainezka joan ziren Bartzelona aldera. Baina Espanyolek 7-0 irabazi zion Realari.

Mailari eusteko borrokan, berriz, gaur jokatuko dute Lagunak-ek eta Eibarrek ere. Nafarrek Las Palmasen aurka jokatuko dute, Barañainen, 12:00etan, eta Eibarrek Katalunian jokatuko du, Tarragonako Gimnasticen zelaian. Lagunak bigarren dago C multzoan (9 puntu), eta Eibar zazpigarren B multzoan (0 puntu).