Realak egin du aurrera, eta Espainiako Kopako final-laurdenetako zozketan egongo dira txuri-urdinak, ostiralean. Athletic astearte gauean sailkatu zen, eta zuri-gorriekin batera zer beste euskal talde egongo zen argitzea falta zen. Realak eta Osasunak elkarren aurka jokatu behar baitzuten final-zortzirenetan. Partida bakarrera, etxeko taldea nagusitu da Anoetan: 3-1.
Bi taldeak aritu dira ondo lehen zatian, eta gol aukerak biek izan dituzte. Reala leial izan zaio bere estiloari, baloiari eutsiz; pixkanaka nagusitu egin da zelaian, eta gorantz egin du. Lehen zatian markagailuari eutsi diote gorritxoek, baina bigarrenean, Odegaardek lehenengo eta Isakek ondoren, erabakita utzi dute partida. Lehen gola ere suediarrak sartu du. 33. minutuan izan da, baina zoriontasunak ez die askorik iraun txuri-urdinei, Cardonak banakoa sartu baitu segidan, hiru minutu geroago.
Hurrengo kanporaketak, segidan
Espainiako Kopak ez du atsedenik hartuko. Ostiralean egingo da final-laurdenetako zozketa, 13:00etan, eta kanporaketa datorren astean jokatuko da, otsailaren 4a eta 6a bitartean, partida bakarrera hori ere. Sailkatzen direnek finalerdietako lehen kanporaketa ere (partida bikoitzera izango da hori) segidan jokatuko dute, alegia, otsailaren 12an.
Tartean nabarmentzekoa da otsailaren 9an Realak eta Athleticek beste derbi bat jokatuko dutela Espainiako Ligan, eta, elkarren aurka jokatu behar izanez gero, gerta liteke astebetean bi derbi jokatzea: hori eta Kopako final-laurdenetakoa. Ostiralean egingo den zozketa garbia izango da, eta ez da baldintzapean egingo.
