Liga bukaera luze egiten ari zaio Realari. Gaur 0-4 galdu du Real Madrilen aurka eta konfiantza falta nabarmena dela ikusi da, bigarren zatian bereziki. Europa Ligako postuak ez luke arriskuan egon beharko, baina Txapeldunen Ligarako lehian sartzea Sevilla eta Athleticen kontua dirudi.
Lehen zatian ondo eutsi dio Realak, baina Illarramendik 44. minutuan aldaratze batean sarturiko gola kolpe gogorra izan da. Mutrikukoak ez du ospatu. Emaitza aurka zuela, Realak aurrera egin du bigarren zatian eta Real Madrilek ondo baliatu ditu erraztasunak zuloa are gehiago irekitzeko. Hori gutxi ez balitz, Bravok huts larria egin du 0-2koan (Bale, 66. min). Azken bi golak inertziaren eraginez izan dira.
Golak: 0-1. Illarramendik (44. min.). 0-2. Balek (66. min.). 0-3. Pepek (85. min.); 0-4 Moratak (87. min.).
