Reala gehiago izan da, eta nagusitasunez irabazi dio Reocini (3-0)

Realak ondo merezitako hiru puntu lortu zituen atzo Zubietan Santanderko Reocinen aurka 3-0 irabazita. Txuri-urdinak askoz gehiago izan ziren, eta eurek izan zuten baloiaren jabetza ia partida osoan. Baloia izatea baino defentsa hoberik ez dago, eta aurkariari ez zioten bere jokoa egiten utzi, bigarren zatian bereziki. Atzoko garaipenari esker, bederatzi puntu ditu Realak, eta Superligan bosgarren postura igo da gaurko partidetako emaitzen zain.

Azken bi partidak galdu ondoren, Realak ezin zuen hutsik egin Reocinen aurka. Santanderko taldeak ez du liga hasiera txarra egin, baina txuri-urdinak gehiago dira, eta lehen minututik sumatu zen aldea. Etxekoek ez zuten baloia askatu, eta erasora jo zuten. Atsedenaldirako 1-0 ziren aurretik, Bergarak korner batean buruz sarturiko golari esker. Bigarren zatian bi taldeen arteko aldea handitu egin zen, eta Realak Reocin bere arean setiatu zuen. Bigarren gola Lizasok sartu zuen, buruz, Lucasek ondo ateratako korner baten ondoren. Lizasok izan zituen aukera onenak, eta gola sartu aurreko minutuan penalti bat huts egin zuen. Hirugarren gola izan zen politena, Garmendiak sarturikoa, Lizasok sakonean emaniko pasea ondo baliatuz.

Partida garrantzitsuak gaur

Athleticek eta Lagunak-ek gaur jokatuko dituzte bosgarren jardunaldiko partidak, eta biek ala biek aurkari zuzenekin neurtuko dituzte indarrak. Athleticek Espanyol hartuko du Lezaman (12:00). Bilboko taldea bigarren postuan dago jokaturiko lau partidak irabazi ondoren, eta gaur laugarren sailkatuaren aurka jokatuko du.

Lagunak-ek, berriz, etxetik kanpo jokatuko du, Atletico Malagaren zelaian (12:30). Barañaingo taldeak arnasa hartu zuen iragan jardunaldian ligako lehen partida irabazita, eta gaur boladari eustea du helburu. Lagunak, egun, 12. postuan dago, Malagarekin berdinduta. Bi taldeek launa puntu dituzte, eta biek gol kopuru berbera sartu eta jaso dute.