Manchesterko itzulera tristea izan da Realeko jokalari eta zaleentzat. Lehen minutuan egindako akats batek ia aukerarik gabe utzi du talde txuri-urdina, eta A multzoko azken postuan da une honetan sailkapenean. Sei puntura du bigarren postua, eta alde horrekin ia ezinezkoa du final-zortzirenak jokatzea.
Begirada, horregatik, hirrugarren postuan du orain Donostiako taldeak. Lau puntura dago Xakhtar Donetsk, eta jokoan bederatzi puntu egonda, irisgarriagoa da helburua. Ez da makala, hala ere. Reala da Txapeldunen Ligan ari diren taldeetatik orain arte puntu bakar bat ere lortu ez duten lau taldeetako bat. Gol bakarra sartu du, gainera, ligaxkan.
Zaleak eta etxeko partidak dira gakoa
Bi aste barru jokatuko dute hurrengo jardunaldia txuri-urdinek, Manchester Uniteden aurka, baina oraingoan, etxean. Ingalaterran erakutsi dute zaleek ilusioa ez dutela falta, eta Anoetan hori bera baliatu behar du taldeak Europako Liga jomugan puntuak biltzen hasteko. Egin ezean, hori ere helburu zaila izango du, ia ezinezkoa.
Ligaxkako bigarren zatia jokatu behar du Realak, eta bi partida jokatuko ditu etxean: Manchesterren eta Bayerren aurka. Ez dira aurkari xamurrak, baina azken saioan alemaniarren aurka jokatzen duenerako, horiek sailkatuta egon daitezke, betiere, azkenaurrekoan Realak Xakhtar mendean hartzen badu. Ez du erraza Realak hirugarren postua, baina lortu, lor dezake.
Espainiako Ligan ahuldu gabe
"Taldea goraka dator. Orain hiru liga partida garrantzitsu datoz", diote jokalariek. Horrela da. Europaren distiratik urrun, Realak Almeria izango du aurkari igandean, 19:00etan, etxean, eta Espainiako Ligan ere ezin du oraingoz punturik ihes egiten utzi. Azken partidan Valentziaren aurka irabazitako partidaren bidetik ezin du atera.
Sailkapenean hamabigarren dira txuri-urdinak, eta, bederatzi partida soilik jokatu badira ere, jaitsiera postuetatik hiru puntura daude. Manchesterren aurka jokatu aurretik Valladolid eta Osasuna ere izango ditu aurkari, datorren astean bi jardunaldi jokatuko direlako. Hiru partida horiek baliatu beharko ditu Europako txapelketara indartuta itzultzeko, baina betiere Ligan gora egiten badu.
