Liga amaitzeko estropada bakarra falta denean, hiru puntuko aldea dago San Juan eta Hibaikaren artean. Bestela esanda: pasaitarrek esku-eskura daukate liga. Sanjuandarrak erabat nagusi izan dira Zarauzko Ikurriñako lehen jardunaldian, eta Zarauzko estropada eta liga, biak eskuratzeko aukera bikaina daukate bihar. Estua eta ikusgarria izan da lehen luzea, ziabogara bost segundo eskaseko aldearekin iritsi direlako San Juan, Hibaika eta Zumaia. Baina, olatuari olatua lotuz, gozatu egin du San Juanek barrurako luzean. Hamalau-hamabost segundoko aldea ere izan du bi aurkari zuzenekiko, baina, berrindartuta, azken unean galera sei segundora murriztu du Hibaikak. Itsaso zabalean erabat ezinean, 38 segundo galdu ditu, azkenerako, Samertolameuk. Bihar 18:00etan jokatuko da Euskotren ligako azken estropada, Zarautzen bertan.
Zarauzko bandera:
1. San Juan 11.09,86
2. Hibaika 11.16,62
3. Zumaia 11.23,92
4. Samertolameu 11.48,22
Sailkapen nagusia:
1. San Juan 26 puntu
2. Hibaika 23 pt.
3. Zumaia 13 pt.
4. Samertolameu 8 pt.
