San Miguel liga ia irabazita dauka Kaikuk, denboraldia osatzeko

Ematen du Kontxako Banderarekin amaitzen dela traineruen denboraldia, baina oraindik bi estropada falta dira sasoia amaitzeko. San Miguel liga datorren asteburuan amaituko da, Bermeoko eta Portugaleteko jardunaldiak jokatu eta gero. Kaiku doa lehen postuan, eta nahikoa aldea dauka liga bigarren urtez jarraian irabazteko: 13 puntu ateratzen dizkio Hondarribiari, eta larunbatean ziurta dezake txapela. Lehen aldiz lortuko luke Kaikuk bi lehia handiak sasoi berean irabaztea, eta handia litzateke. Gentza Iraitz Zubiri asteburura begira jarri da: «Uste dut Kontxan kanpoan geratu zirenek egingo dutela arraunean».