Santurtzik Eusko Label ligako lidergoa sendotu du, gaur, Boiroko bandera irabazi eta gero. Lehiaketa amaitzeko sei jardunaldi falta direla, Iker Zabalak entrenatutako taldeak 129 puntu dauzka. Hondarribia bigarren izan da, gaur, Galiziako uretan, eta, hain zuzen, Ama Guadalupekoa da bigarren sailkapen nagusian, 120 punturekin. Iaz, Eusko Label liga aurrenekoz irabazi zuen Sotera ontziak, eta, aurten, bide beretik doa. Orain arte jokatutako hamabi jardunaldietatik lau irabazi ditu Bizkaiko traineruak.
Larunbatean, Arousan, bigarren izan zen. Orduan espero baino motelago ibili zen Hondarribia, eta, hori dela eta, bigarren txandan arraun egin du, gaur, Mikel Orbañanosek entrenatutako taldeak. Horretan jaun eta jabe izan da, eta hirugarren txandako ontziei lanak zaildu dizkie.
19.23.56 zen hobetu beharreko denbora, eta, aurreneko bi ziabogetan, Santurtzik ez ditu hobetu Hondarribiak egindako denborak. Hirugarrenean, denbora bera egin dute (14.40), baina azkeneko luze azkarragoa egin du Santurtzik, eta Boiroko 31. Bandera irabazi: 19.21.44
Hurrengo bi jardunaldiak Zarautzen jokatuko dituzte datorren astean. Larunbatean eta igandean Zarauzko Ikurrina egongo da jokoan.
KAE 1 ligan, Getaria
KAE 1 ligako 11. jardunaldia jokatu dute, gaur, Getarian (Gipuzkoa), eta etxeko ontziak irabazi du estropada. Modu horretan lidergoa indartu du Ion Larrañagak entrenatutako taldeak. 20.58,56ko denbora egin du. Bigarren Pedreña izan da, segundo eskas batera (20.59,69). Bi traineruak, KAE 1 ligako orain arteko erregularrenak, nor baino nor gehiago aritu dira estropada guztian. Getariak 11,27 puntu dauzka sailkapenean, eta Pedreñak 11,09. Oraintxe, haiek dira igotzeko kanporaketa jokatzeko hautagai nagusiak. Castron (Espainia) egingo dute hurrengo estropada, datorren larunbatean.
