Sasoi onean daude Lagun Aro eta Kanaria Handia

Balantze ezin txarragoa dauka Lagun Arok Kanaria Handian (21:30). Las Palmasen jokatu duen aldiro galdu du, lau denera, eta datu txarra da hori. Urteren batean irabazi beharko du, eta noizbait izatekotan, gaurkoak aukera aproposa dirudi. Donostiarrak sasoiko sasoi onenean daudelako. Azken bi partidak irabazi dituzte, eta bietan hankapean ibili dute aurkaria: Joventut aurrena, eta Fuenlabrada joan den astean. 93 puntu sartu zituzten Badalonan, eta 86 Donostian. Jaso, aldiz, 70 bakarrik. Sito Alonsoren taldea erasoan eta defentsan bikain ari dela esan nahi du horrek, eta errenkadan hirugarren garaipena lortzea baino ezer hoberik ez, urtea pozik bukatzeko.

Kanaria Handia, ordea, plaza zaila da. Tradizioz, eta bertakoak ere emaitza bolada onean daudelako. Gipuzkoarrak bezala, bi garaipen lortu dituzte jarraian: Obradoiro eta Valladolid. Buelta eman diote nahiko kaskarra izan zen liga hasierari. Pedro Martinezen taldeak etxeko partidak egiten ditu bere arrakastaren ikur, eta han irabaztea aski zaila izaten da talde gehienentzat. Kanaria Handia 5-7 balantzearekin dago, eta oraindik Kopan sartzeko aukerak dauzka. Bistan da seigarren garaipena lortuz gero gertuago edukiko dutela euren helburua.

Marquez Haynes da Kanaria Handiko jokalari onena. Valladoliden aurka 35 puntu saskiratu zituen, eta egun ona badauka, oso jokalari arriskutsua da. Saskipean, aldiz, herren samar dabil Kanaria Handia. Xavi Rey kataluniarrak ez zuen jokatu Valladoliden, baina gaur kantxaratzeko prest egongo da. Doblasek eta Bettsek azti ibili beharko dute pibot indartsu hori saskitik urrun mantentzeko. Hurrengo astetik aurrera laguntza jasoko dute, Lagun Arok Andy Ogide nigeriarra fitxatu baitu. Sasoi osorako da hitzarmena, baina taldeak hilabete baten buruan moztu dezake. Adelekeren tankerako ezaugarriak dituen hegalekoa da.