Sasoia ez da amaitu

Osasunazale askorentzat denboraldia ostegunean amaitu zen, Sanchez Pizjuan futbol zelaian. Espainiako Liga amaitzeko sei jardunaldi falta direla, jaisteko postuetatik zazpi puntura daude gorritxoak. Beraz, badirudi eskura duela mailari eustea. Mailari eustea baino lorpen handiagoak lortzea ezinezkoa dela ere bazekiten osasunazaleek, dena dela. Eta horregatik UEFA Kopan jarri zituzten itxaropen eta ilusio guztiak. Sevillak UEFA Kopatik at utzi zituen nafarrak, ordea. Eta orain, ezerk ez du ilusiorik eragiten. Hargatik, denboraldiko helburu nagusia mailari eustea zen Osasunarentzat, beti bezala, eta helburua ondo bideratua duen arren, garrantzitsuena egitea falta zaio: ez dela jaitsiko matematikoki ziurtatzea. Mallorcan irabazita ere, ez dute matematikoki ziurtatuko, baina esku-eskura izango dute gorritxoek helburua. Eta Zigandak badaki hori. Hasierako hamaikakoan sei aldaketa egingo ditu, eta irabazten ahaleginduko dira gorritxoak Ono Estadin.

«Denboraldia ez da oraindik amaitu, eta UEFA Kopak utzitako sentsazio hori gainditu beharra daukagu. Hanburgoren aurkako kanporaketa jokatu eta gero ere antzeko egoera izan genuen, eta orain ezin dugu iparra galdu. Lehian jarraitzeko gauza garrantzitsu ugari dago oraindik jokoan, eta denetan garrantzitsuena mailari eustea da. Berehala lortu nahi dugu salbazioa. Egundoko atsekabea dugu, penatuta gaude, baina ahalegin bat egin behar dugu arreta Ligan jartzeko. Helburua gertu dago, baina oraindik ez dugu ziurtatu salbatuko garela. Oraindik ere UEFA Koparen oihartzuna gurekin dugu, baina Ligan jarri behar dugu burua, nahitaez. Ez gaude egoera larrian, baina Liga amaitu aurretik larri ibili nahi ez badugu, irabazi egin behar dugu».

Zigandaren ustez, UEFA Kopan egindako lan ederra eta gero atsekabetuta izatea ere ez da oso normala. «Denbora gutxi igaro da, eta une honetan finalean izateko aukera on bat alferrik galdu genuela soilik pentsatzen dugu. Hargatik, hilabete batzuen ostean ikusiko dugun bezala ikusi behar dugu UEFA Kopako ibilbidea gaurtik. Eta denok badakigu ibilbide dotorea egin dugula», onartu zuen atzo gorritxoen entrenatzaileak. Baina hori bai, bere zalantzak ere agerian utzi zituen: «Taldeak Ligan buru belarri jarri nahi duela ikusten dut, baina ea nola aritzen garen gaur Mallorcan. Egitea baino errazagoa da esatea, eta aurkaria une gozoan aurkituko dugula ere ezin da ahaztu. Etxean jokatu dituen azken sei partidak irabazi ditu Mallorcak. Oraindik salbazioa ez dugula ziurtatu ezingo dugu ahaztu».



WEBO, MIN HARTUTA. Sevillaren aurka jokatu aurretik min hartutako jokalaririk ez zuen Osasunak aspaldiko partez. Herenegun, ordea, Milosevicek eta Delportek zuntz haustura bana dutela baieztatu zuten Osasunako medikuek. Eta atzo goizean Webok ezker zangoko orkatila bihurritu zuen. Milosevicek hiru aste beharko ditu osatzeko, Delportek agur esan dio sasoiari, eta Weboren lesioa zehaztu gabe dago, baina astelehena arte atseden hartu beharko du gutxienez.

Hasierako hamaikakoari dagokionean, Zigandak sei aldaketa egingo ditu Sevillan (Espainia) aritu zen taldearekin alderatuz: Izquierdok, Cuellarrek, Corralesek, Juanfranek, Raul Garciak eta Webok, Javier Flañori, Josetxori, Monreali, Juanluri, Valdori eta Soldadori emango diete lekukoa.

UEFA Kopaz hasi dira hizketan Mallorcan

Orain hilabete maila galtzeko hautagaietako bat zen Mallorca, baina Gregorio Manzanoren taldeak sei garaipen eskuratu ditu etxean jokatu dituen azken sei partidetan. 42 puntu ditu, eta mailari eutsi dio jadanik. Hala ere, sei jardunaldiren faltan UEFA Kopa zazpi puntura dutela ikusita, datorren sasoian Europan jokatzearekin amesten ere hasi dira. Manzano zuhur mintzatu da, ordea: «Beste talde askoren helburua ere bada UEFA Kopa, eta gu pausoz pauso joatera behartuta gaude. Osasuna mendean hartuz gero, 45 puntu izango ditugu, eta iragan sasoian bildutako puntu kopurua gaindituko dugu. Gero gerokoak». Zazpigarren sailkatuak UEFA Koparako sailkatuko da ziurrenik, baina une honetan zazpigarren den Recreativoren eta Mallorcaren tartean bost talde daude: Racing, Getafe, Vila-real, Deportivo eta Espanyol. Ez da harritzekoa Manzanoren zuhurtzia.