Dezenteko liskarrarekin hasi da Espainiako Vuelta. Kirol lehia hasi, biharko hasiko da, Marbellan, baina bezperan iritsi da albistea: ibilbideak daukan arriskuaren eraginez, taldekako sailkapenerako soilik hartuko dituzte kontuan 7,4 kilometroko taldekako erlojupekoko denborak. Txirrindulari guztiek, beraz, denbora berarekin ekingo diote igandeko etapari, Vueltako bigarrenari.
Zalantza eta kexa asko izan da azken egunotan, zorua oso arriskutsu egongo delako. Kare harria daukate ibilbidearen zati luze batean, oinarrian hondarra daukan zorua, eta txirrindularien segurtasuna ez dagoela bermatuta salatu dute talde askok. Txirrindularitzaren Nazioarteko Batasunarekin (UCI) harremanetan jarri dira horietako asko, eta, bilera egin ondoren, txirrindularien denborak kontuan ez hartzea erabaki dute epaileek. Puerto Banusetik abiatuko da Vuelta, 18:40an, eta 20:33an iritsiko da azken taldea Marbellara.
