Sellaren hirugarrena Giroan, eta Contador lider

Emanuele Sella italiarrak irabazi du Italiako Giroko azken aurreko etapa, aurtengo Giroan irabazten duen hirugarrena. Mortirolon gora izan da mugimendua faboritoen artean, baina inork ez du estu hartu Contador liderra. Sellak Apricara bidean egin du ihes, bakarrik gainditu du azken mendatea, eta garaile sartu da Tiranoko helmugan. Sailkapen nagusiko lehen bi postuek berdin jarraitzen dute —Contador lider eta Ricco lau segundora—, baina Di Lucak hirugarren postua galdu du, txakalaldia izan baitu gaurko etapan eta bost minututik gora galdu. Bihar bukatuko da Italiako Giroa. 28,5 kilometroko erlojupekoa izango dute Cesano Maderno eta Milanen artean. Printzipioz, Contadorrek eskura du Giroa, Ricco baino hobeto moldatzen baita erlojupekoan.