Suediak eta Kroaziak Alemaniari eta Frantziari irabazi diete, Nazioen Superkopan

Suediak eta Kroaziak bikain ekin diote Nazioen Superkopari, Alemaniari eta Frantziari irabazita. Batak zein besteak aurrerapauso handia eman dute finalerdietan izateko. Alemaniak eta Frantziak, aldiz, ezusteko porrotak jaso zituzten, eta zaila dute finalerdietarako sailkatzea.

Etxekoek Europako txapeldunaren kontra galdu zuten: 30-25. Alemania ezinean aritu zen partida guztian zehar, Svenssonek eta Gentzelek defendatzen zuten atea zulatu ezinik. Heiner Branden taldeak asko bota zuen faltan ezkerraldeko jokalarien lan ona: Kretzchmarrek, Hensek, Grimmek eta Von Behrenekgol bana egin zuten. Erdialdean eta eskuinaldean, berriz, txukun aritu ziren: Schwarzerrek sei gol, eta Dragunskik eta Kerhmannek hiruna.

37. minutua arte nor baino nor aritu ziren bi taldeak (17-17), baina hortik aurrera, Suedia izan zen nagusi. Bengt Johanssonen zuzentzen dituen jokalariak ondo baino hobeto hasi ziren jokatzen, golak aise egiten eta alemaniarren erasoak ezerezean uzten. Suediarren artean Ahlm izan zen lan onena egin zuena. Alemaniako THW Kiel taldeko jokalariak bederatzi gol egin zituen, eta etxekoen defentsa erotu zuen ia. Ahlmez gain, Boqvistek eta Ernelindek ere lan txukuna egin zuten: bost eta lau gol, hurrenez hurren.Kroaziak, aldiz, agerian utzi zuen azken Munduko Txapelketa irabaztea ez zela kasualitatea izan. Lino Cervarren taldeak partida oso serioa jokatu zuen, eta Frantziak estutasunetan jarri zuen arren, garaipenak ez zion ihes egin: 23-22. Jerome Fernandez frantziarra izan zen partidako goleatzaile nagusia: bederatzi gol.

Suedia-Errusia eta Espainia-Kroazia gaur,

Bigarren jardunaldia jokatuko da gaur. Bi partida jokatuko dira: Suedia-Errusia eta Espainia-Kroazia. Lehen partidan, Suediak finalerdietarako txartela lor dezake, faborito baita.Bigarren partidan, aldiz, lehia gogorra espero da. Espainia errebantxa gogoz dago, Munduko Txapelketan Kroaziak utzi baitzuen finaletik at, bi luzapen jokatu eta gero.