Sufrimenduaren bidetik

Bera Bera. Zoqbi, Altuna (1), Rubio (3, 2 p.), Elorza (2), Nuñez (2), Dunay, Ziarsolo (1) —hasierako zazpikoa—; Pinedo (9, 2 p.), Ederra (2), Menendez (4) eta Castro (2).

Danubius Galati. Bobeica, Zaremba (1), Curtean (4), Cioaric (1), Marginean (3), Glibko (8), Lazarin (3) —hasierako zazpikoa—; Burlatxenko (2), Patuleanu (1), Gheorghe, Trandafir, Crivlevit eta Basa.

Markagailua. 0-3, 1-3, 1-4, 2-4, 2-5, 4-5, 4-7, 5-7, 5-8, 7-8, 7-9, 10-9, 10-11, 11-11, 11-12, 13-12 (atsedenaldian); 13-13, 14-13, 14-14, 15-14, 15-16, 19-16, 19-17, 20-17, 20-20, 21-20, 21-22, 26-22 eta 26-23.

Epaileak. Di Domenico eta Fornasier (Italia). Bi minutuz kanporatuak: Bera Berako Nuñez (bi aldiz), Carrere eta Elorza; eta Danubius Galatiko Zaremba (2), Curtean, Burlatxenko eta Glibko.

Bestelakoak. 600 ikusle Gaska kiroldegian. Itzuliko partida gaur jokatuko da, Bidebietan (12:00).

Aurkariari buruzko informazio gehiegi ere ez zeukaten Donostia aldean, baina eurena talde hobea zela sinetsita ekin zioten Reyes Carrereren jokalariek Europako Errekopako final-hamaseirenetako joaneko partidari. Atzo bat eta gaur bestea. Bi partidak Donostian jokatuko dira. Horrek ere eman zezakeen pista txiki bat; donostiarrak ziren faborito aurrera egiteko. Eta hala dira orain ere. Baina Danubius Galatik uste baino maila hobea eman zuen atzo. 26-23koarekin, Bera Berak ez luke arazorik beharko gaur aurrera egiteko, baina gipuzkoarrek ez zuten ondoegi pasa.

Lehen bost erasoetan huts egin zuten bi taldeek, eta bigarren minutua pasata zegoela iritsi zen lehen gola (0-1), errumaniarren kontraeraso onean. Joko bizian oinarritzen du Bera Berak jokoa, baina atzo gehiegizko prezipitazioarekin nahastuta iritsi zen bizitasuna. Eider Rubiok eta Matxalen Ziarsolok huts egindako bi penaltiren ondoren —Danubiusek ere huts egin zuen lehen bietan—, sei minutu eta erdi bete zirenean iritsi zen etxekoen lehen gola, Pinedoren eskutik; 1-3koa zen. Zorrotz hasi ziren errumaniarrak defentsan, eta bizi erasoan; 1-4koa lortu zuten hurrengo jokaldian.

11. minuturako bost baloi galduta zeuzkan etxeko taldeak, eta lau Errumaniakoak —bien artean, 29 pilatu zituzten azkenerako—. 4-5 gerturatu arren, Elorzak eta Rubiok erasoan trakets samar jokatzen jarraitu zuten, eta errumaniarrek alde polita lortu zuten (4-7 eta 5-8). 20. minutuan eskatu zuen Reyes Carrerek lehen hutsartea, eta Eli Pinedo defentsa aurreratu gisa jarrita, Bera Berak ondo lotu zuen Danubiusen erasoko jokoa. Kontraerasoan min eginez, 24. minutuan berdindu zuten etxekoek, lehen aldiz, partida (9-9), Eider Rubioren golari esker. Bi minutuko lehen zigorra jaso zuten, gainera, errumaniarrek gol horretan, eta lehen zatia joan zen bezala joanda, donostiarrek hainbestean txukundu zuten markagailua atsedenaldirako (13-12).

Nekea eta 5-0eko partziala

Bigarren zatia ez zen ondoegi hasi, errumaniarrek sartu zutelako lehen gola (13-13). Baina nekeak eta Soqbi atezainaren lan onak nabarmendu zuten bi taldeen arteko aldea. Hori bai, bigarren zatiko lehen zazpi minutuetan bi gol soilik sartu zituzten etxekoek. 15-14 zegoen markagailua. Partidaren gogortasunaren seinale, Bera Berak 42. minutuan lortu zuen, lehen aldiz, bi goleko aldea (18-16). 19-16 eta 20-17 ere aurreratu zen, baina errumaniarrek 0-3ko partziala lortu zuten segidan (20-20). 21-22 ere aurreratu ziren, gipuzkoarrek 5-0eko partziala lortu aurretik. Azken segundoan sartu zuen Danubiusek 23. gola, baina, hainbeste sufritu ondoren, pozik egoteko moduan dira donostiarrak.