Ezin du irabazi Athleticek. Urruti geratu da joan den abuztuaren 21ean, San Mamesen, Espainiako Ligako estreinakoan, Leganesi 2-1 irabazi zion eguna. Ordutik bederatzi partida jokatu ditu talde zuri-gorriak eta ez da gai izan hiru puntuak kolpe batean lortzeko. Zazpi partida berdindu ditu, eta bi galdu, hots, jokoan egon diren azken 27 puntuetatik zazpi besterik ez ditu eskuratu. Horren ondorioz, sailkapeneko azken postuetan da: hamaseigarren postuan dago.
Gaur ere ez da gai izan Valentzia mendean hartzeko. Eduardo Berizzok aldaketak egin ditu hasierako hamaikakoan: indarra lehenetsi du kalitatearen gainetik. Hala, Mikel Rico eta Mikel San Jose zelairatu ditu, eta aulkian utzi Iñaki Williams eta Iker Muniain. Bada, apustu horrek ere ez dio emaitzarik eman. Ez du partida ona egin Athleticek, ezta Valentziak ere. Biek izan dute aukera garbi bat gola sartzeko, baina Herrerirek bikain gelditu du Rodrigoren burukada, eta Netok beste horrenbeste egin du Raul Garciaren jaurtiketarekin.
