Sven Nysek hankapean ibili ditu aurkariak Asteasun

Adinarekin bizitasuna galtzen omen da, baina Sven Nysek (Landbouwkrediet) tarteka erakusten du bizi-bizi ibiltzen ere badakiela. Asteasuko nazioarteko lasterketa jokatu zuten atzo, Igorreko Munduko Kopako probaren biharamunean, eta belgikarrak erakustaldi handia eman zuen, hasi eta bukatu. Isaac Suarez espainiarra (Cantabria Infinita) irten zen dotore, eta lehen belardian bera sartu zen buruan. Baina, Klaas Vantornout belgikarraren (Sunweb) saio hutsalaren ondoren, atzetik aurrera egin, eta lehen itzulirako lasterketa buruan jarri zen Nys. Hori bakarrik ez. Erritmo itoa jarrita, beste inor ez zen gai izan belgikarraren gurpilari eusteko. Ezta Niels Albert (Powerplus) Munduko Kopako liderra ere. Hasi eta bukatu, nahierara ibili zen atzo Nys. 2007an bezala, bi besoak altxatuta iritsi zen helmugara.

Hainbestekoa izan zen belgikarraren nagusitasuna, 50 segundora helmugaratu zen Kevin Pauwels (Fidea), eta 1.14 minutura Albert. Egoitz Murgoitio bizkaitarra (Hirumet) izan zen euskaldunik onena. 11. postuan iritsi zen helmugara, 4.15 minutura -erori egin zen probaren hasieran-. Lan bikaina eginda, 12. postuan sailkatu zen Erlantz Uriarte (Ibaigane), lau minutu eta erdira.

Igorren, Niels Albert nagusi

Atzo nahi eta ezinean ibili zen Niels Albert Asteasun, baina herenegun dotore irabazi zuen Igorreko Munduko Kopako proba, eta lider jarri da. Francis Mourey frantziarra (FDJ) sailkatu zen bigarren, eta Sven Nys hirugarren. Egoitz Murgoitio izan zen euskaldunik onena, 11. postuan.

Sailkapena

ASTEASUKO LASTERKETA

1. Sven Nys (Landbouwkrediet) 1.02.45

2. Kevin Pauwels (Fidea) 50era

3. Niels Albert (Powerplus) 1.14ra

4. Sven Vanthourenhout (Pow.) 1.27ra

5. Bart Wellens (Fidea) 1.53ra

6. Klaas Vantornout (Sunweb) d.b.

11. E. Murgoitio (Hirumet) 4.15era