Teletovic, Panko eta Vidal, ACB ligako bostekorik onenean

Astelehenean aurkeztuko dituzte, modu ofizialean, ACB ligako titulurako kanporaketak, eta orduan jakinaraziko dute nor hautatu duten jokalaririk onena. Aurrez, ligako bosteko onenaren berri eman dute. Entrenatzaile, jarraitzaile, jokalari eta kazetarien arteko bozketaren ostean hautatzen da bostekorik onena, eta Lagun Aroren denboraldi bikainak oihartzun handia izan du, Andy Panko eta Sergi Vidal aukeratu baitituzte 2 eta 3 postuetan. Baskoniako Mirza Teletovic ere bai, hegaleko-pibot postuan. Teletovic izan da, hain zuzen ere, 100 puntuko balorazioa jaso duen bakarra. Sergio Llull eta Erazem Lorbek izan dira beste bi hautatuak, joko antolatzaile eta pibot postuetan.