Ten Dam nagusi Nazioarteko Kriteriumean

Laurens Ten Damek bereganatu zuen arreta osoa atzo Nazioarteko Kriteriumeko lehen etapan. Rabobank taldeko txirrindulari herbehereetarrak etapak zituen 193 kilometroetatik 190 kilometro ihesean egin ondoren lortu zuen garaipena. Proba hasi eta hiru kilometro eskasera egin zuen ihes Ian McKissick (BMC) estatubatuarrarekin batera. 165 kilometro egin zituzten bi txirrindulariok elkarrekin ihesean, baina helmugara iristeko 25 kilometroren faltan Ten Damek atzean utzi zuen McKissick. Helmugan hamabost segundo atera zizkion tropelari. Benoit Vaugrenard frantziarra (La Francaise des Jeux) eta Mirco Lorenzetto italiarra (Lampre) izan ziren lehenak tropelean.

Atzoko garaipenarekin, sailkapeneko lehen sailkatua da ere Ten Dam. Ezustekorik ezean, herbeheretarrak lehen postua galduko du gaur. Goizean 98,5 kilometroko etapa jokatuko da, eta arratsaldean, 8,3 kilometroko erlojupekoa. Erlojuaren aurkako saioak erabakiko du Nazioarteko Kriteriumeko irabazlea.



GAUR, LAUDIOKO SARI NAGUSIA. E3 Prijs Vlaanderen Klasikoa jokatu zen atzo, datorren igandean jokatuko den Flandesko Itzulia prestatzeko lasterketa aproposa. Kurt Asle Arvesen norvegiarrak (CSC) lortu zuen garaipena, David Kopp alemaniarraren (Gerolsteiner) aurretik.

Gaur, berriz, Laudioko 59. Sari Nagusia jokatuko da. Hamabost taldetako 140 txirrindulari ariko dira lehian 175,5 kilometroko ibilbidean, Euskaltel-Euskadi eta Orbea-Oreka euskal taldeetako karreristak tartean. Urtero legez, Garate lehen mailako mendateak galbahe lanak egingo ditu, are gehiago helmugarako bost kilometro eskasen faltan bigarren aldiz igoko dela kontuan hartuta. Faboritoen artean, Igor Anton, Iker Camaño, David Arroyo, Joaquin Rodriguez, Francisco Mancebo, Angel Vicioso, Koldo Gil eta Eladio Jimenez egon daitezke.

Lasterketa 09:30ean hasiko da, Laudioko Zumalakarregi hiribidetik, eta toki berean amaituko da eguerdi partean.