Geraint Thomasek (Sky) irabazi du E3 Harelbeke klasikoa. Galestarrak, ordea, arreta gutxi bereganatu du. Helmugara iritsi ez den txirrindulari batek bereganatu du arreta ia osoa, Fabian Cancellarak, hain zuzen ere. Trek taldeko suitzarra erori egin da lasterketa hasi eta gutxira, 40. kilometroan, Haaghoek harbide eremuan. Txirrindulari asko joan dira lurrera eroriko berean, tartean John Degenkolb (Giant) edo Lars Boom (Astana). Alemaniarra eta herbeheretarra gai izan dira aurrera egiteko. Cancellara saiatu da, baina alferrik.
Okerrena, ordea, iristeko zegoen. Izan ere, azterketa medikuen arabera, hautsita ditu bizkarraren behekaldeko bi orno. Beraz, bukatu dira udaberriko klasikoak harentzat. Ez Gante-Wevelgem, ez Flandriako Tourra, eta ez Paris-Roubaix. Hura gabe, klasiko horiek guztiek distira galduko dute.
