Thomas Voecklerrek (Europcar) irabazi du Frantziako Tourreko 16. etapa —Paue eta Bagneres de Luchon artean, 197 kilometro—. Chris Anker Sorensen (Saxo) izan da bigarren, eta Gorka Izagirre (Euskaltel-Euskadi) hirugarren. 38 txirrindulariko ihesaldian izan dira hirurak. Sailkapen nagusiko lehen hiru sailkatuak —Bradley Wiggins liderra, Chris Froome eta Vincenzo Nibali— elkarrekin sartu dira, gainontzeko faboritoei aurrea hartuta.
Haimar Zubeldia, bestalde, bosgarren jarri da sailkapen nagusian, laugarren zen Evansek huts egin baitu gaurko etapan.
Pirinioetako etapa nagusia izan da gaurkoa, eta hiru ondorio nagusi utzi ditu: batetik, Voecklerrek gutxitan barkatzen duela ihesaldietan; bestetik, Wiggins, Froome eta Nibali besteak baino koska bat gorago daudela; eta aurtengoa ez dela Cadel Evansen Tourra, azkenik.
38 txirrindulariko ihesaldia egin da etapako lehen kilometroetan, baina Tourmaleten gora hautsi egin da. Voeckler eta Brice Feillu (Saur) geratu dira aurrean, eta, atzean, Voigt (Radioshack), C. Sorensen (Saxo), Vinokourov (Astana) eta Izagirre batu dira haiek harrapatzeko. Pelotoian ez da jo handirik izan; hala ere, Aspin mendatean Ivan Basso Nibalirentzako lanean jarri da eta Evansen ezina azaleratu du; aldapa behera berriz ere sartu da, baina Peyresourden geratu egin da.
Lasterketa Peyresourden erabaki da, helmuga baino lehen zegoen mendatean. Voecklerrek Feillu atzean utzi du eta indartsu abiatu da garaipenaren bila. Atzetik Sorensen hurreratu egin zaio, baina alferrik. Pelotoian Nibalik Basso taldekideari erreleboa hartu eta erasoa jo du. Wiggins liderra eta Froome baino ez dira izan hari erantzuteko gai. Tourreko indartsuenak.
Voecklerrek Tour honetako bigarren garaipena lortu du hala. Europcar taldearen hirugarrena da (Pierre Rollandek ere irabazi zuen). Wigginsek lider jarraitzen du.
Bihar 17.etapa korrituko dute —Bagneres de Luchon-Peyragudes, 142,5 kilometro—. Pirinioetako bigarren etapa handia izango da; Mente (1. mailakoa), Ares (2.goa), Burs (3.goa) eta Bales mendateak (berezia) igoko dituzte lehenik, eta Peyragudesen (1. mailakoa) amaituko dute.
16. etapako sailkapena
1. Thomas Voeckler (Europcar) 05:35:02
2. Chris Anker Sorensen (Saxo) 1.40ra
3. Gorka Izagirre (Euskaltel-Euskadi) 3.22ra
4. Alexandre Vinokourov (Astana) 3.22ra
5. Brice Feillu (Saur) 3.58ra
6. Jens Voigt (Radioshack) 4.18ra
7. Daniel Martin (Garmin) 6.08ra
8. Simone Stortoni (Lampre) 6.08ra
9. Gianpaolo Caruso (Katuxa) 6.08ra
10. Laurens Ten Dam (Rabobank) 6.11ra
Sailkapen nagusia
1. Bradley Wiggins (Sky) 74:15:32
2. Christopher Froome (Sky) 2.05era
3. Vincenzo Nibali (Liquigas) 2.23ra
4. Jurgen Van den Broeck (Lotto) 5.46ra
5. Haimar Zubeldia (Radioshack) 7.13ra
6. Tejay Van Garderen (Bmc) 7.55era
7. Cadel Evans (Bmc) 8.06ra
8. Janez Brajkovic (Astana) 9.09ra
9. Pierre Rolland (Europcar) 10.10era
10. Thibaut Pinot (Fdj) 11.43ra
Orain arteko etapak
- Aitzin-etapa. Irabazlea: Fabian Cancella. Liderra: Fabian Cancella.
- 1. etapa. Irabazlea: Peter Sagan. Liderra: Fabian Cancellara.
- 2. etapa. Irabazlea: Mark Cavendish. Liderra: Fabian Cancellara.
- 3. etapa. Irabazlea: Peter Sagan. Liderra: Fabian Cancellara.
- 4. etapa. Irabazlea: Andre Greipel. Liderra: Fabian Cancellara.
- 5. etapa. Irabazlea: Andre Greipel. Liderra: Fabian Cancellara.
- 6. etapa. Irabazlea: Peter Sagan. Liderra: Fabian Cancellara.
- 7. etapa. Irabazlea: Christopher Froome. Liderra: Bradley Wiggins.
- 8. etapa. Irabazlea: Thibaut Pinot. Liderra: Bradley Wiggins.
- 9. etapa. Irabazlea: Bradley Wiggins. Liderra: Bradley Wiggins.
- 10. etapa.Irabazlea: Thomas Voeckler. Liderra: Bradley Wiggins.
- 11. etapa. Irabazlea: Pierre Rolland. Liderra: Bradley Wiggins.
- 12. etapa.Irabazlea: David Millar. Liderra: Bradley Wiggins.
- 13. etapa. Irabazlea: Andre Greipel Liderra: Bradley Wiggins.
- 14. etapa. Irabazlea: Luis Leon Sanchez. Liderra: Bradley Wiggins.
- 15. etapa. Irabazlea: Pierrick Fedrigo. Liderra: Bradley Wiggins.
- 15. etapa. Irabazlea: Thomas Voeckler. Liderra: Bradley Wiggins.
