Frantziako Tourreko 17. etapan gerta daitekeenaren adibide bat izan da Dauphineko bosgarren etapa. Romain Bardetek (Ag2r) Allos lehen mailako mendatean behera jo du erasoa, Sky tropel buruan zela, eta minututik gorako aldea lortu du jaitsiera teknikoan. Pra Loup bigarren mailako mendatea geratzen zitzaion artean igotzeko, sei kilometroko igoera etzana, eta frantziarrak garaipen handia lortu du azkenerako. Aurretik, 24 kilometro falta zirela geratu da ezerezean ihesaldiaren saiakera, Romain Sicard (Europcar) tartean zela.
Bardet garaipenarekin gozatzen ari zela, Chris Froome ere (Sky) mugitu da azken unean, bi kilometro falta zirela, baina Tejay Van Garderenek (BMC) errematea eman dio azken 500 metroetan. Estatubatuarra jarri da lider, Beñat Intxausti (Movistar) dago bigarren, hemezortzi segundora dago —laugarren izan da gaur, 42 segundora—, eta Bardet hirugarren, 20ra. Faboritoen artean, 1.11 galdu du Joaquim Rodriguezek (Katuxa), 1.53 Alejandro Valverdek (Movistar) eta 1.59 Vincenzo Nibalik (Astana).
