Triste? Baina nor dago triste?

Tristurak ahazteko ona izango da Real Madrilek atzo jokatu zuen partida. Hori da jokatzea, hori. Triste? Nor dago triste? 90. minutuan 3-2koa lortu eta taldekide guztiak gainera erakarri zituen jokalaria? Horixe nahi eta behar zuen Cristiano Ronaldok, eta bere hitzak gaizki ulertu zirela esango du gaurtik aurrera. Real Madrilek 3-2 irabazi zion atzo Manchester Cityri Txapeldunen Ligako ligaxkako lehen jardunaldian. Eroa izan zen partida, ingelesak 0-1 eta 1-2 aurretik jarri zirelako. Baina Benzemak sartu zuen 2-2koa 87. minutuan, eta Cristiano Ronaldok 3-2koa 90.ean. Multzoko beste partidan, 1-0 irabazi zuen Borussia Dortmundek Ajaxen aurka, 87. minutuan Lewandowskik sartutako golari esker.

Aipagarria izan zen oso Malagak Zeniten aurka egin zuen partida harrigarria ere. Espainiarrak lehen aldiz ari dira Txapeldunen Ligan, eta 3. minuturako aurretik ziren, Iscori esker. Saviolak sartu zuen 2-0ekoa, 13. minutuan, eta Iscok berak 3-0ekoa 76.ean. Beste norgehiagokan, 0-0 berdindu zuten Milanek eta Anderlecht-ek.

Malagaren moduan, PSGk ere aise irabazi zuen Dinamo Kieven aurka (4-1). Ibrahimovicek sartu zuen lehen gola, penaltiz, 19. minutuan; Thiago Silvak 2-0ekoa, 29.ean; eta Alexek 3-0ekoa, 32.ean. Horrela amaitu zen lehen zatia. Dinamo Kievek 87. minutuan sartu zuen 3-1ekoa, Miguel Velosori esker, eta Pastorek sartu zuen laugarrena, 91. minutuan. A multzoan, Portok garaipen garrantzitsua lortu zuen Dinamo Zagreben zelaian. Lucho Gonzalezek sartu zuen 0-1ekoa (41. min.), eta Defourrek 0-2koa, 92.ean. B multzoan, irabazten hasi ondoren, Montpellierrek 1-2 galdu zuen Arsenalen aurka. Eta baita Olympiakosek Schalke 04ren aurka ere.

Lehen jardunaldiko beste zortzi partidak jokatuko dituzte gaur. Chelsea egungo txapeldunak hasiera zaila izango du, Juventusen aurka. F multzoan partida estua espero da Bayernen eta Valentziaren artean ere. Eta Bartzelonak eta Manchesterrek ere gaur ekingo diote lehiari, Spartak Mosku eta Galatasarayren aurka.