Trussovek esprintean irabazi du Voltako bosgarren saioa

Kataluniako Voltako bosgarren etapa jokatu zen atzo La Seu d'Urgell eta Torredembarra artean (201 kilometro), eta Nikolai Trussov (Katusha) errusiarra izan zen azkarrena esprintean, Thor Hushovd (Cervelo) eta Fabio Sabatiniren (Liquigas) aurretik. Alejandro Valverdek (Caisse d'Epargne), aldiz, lidertzari eutsi dio. Bi etapa falta dira itzulia bukatzeko, eta Haimar Zubeldia (Astana) euskalduna hirugarrena da sailkapen nagusian, espainiarrarengandik 22 segundora.

Bezperan jokatu zen etapa nagusia, baina atzo ere azkar ibili ziren txirrindulariak. Pirinioetatik Mediterraneo ertzera egin zuten, eta 13. kilometroan sortu zen eguneko ihesaldia. Cozza (Garmin), Sapa (Lampre), Serrano (Contentpolis-AMPO) eta Ramirez (Andalucia) sartu ziren horretan. Caisse d'Epargne liderraren taldeak aurrera egiteko baimena eman zien, eta horrregatik alde handia pilatu zuten.

Baina esprinterren taldeak jarri ziren tropelaren buruan; batik bat, Milram eta Cervelo. Helmugatik gertu irentsi zituzten, baina Cozza AEBetarra ez zegoen amore emateko prest. Halere, helmugatik hiru kilometro pasatxora harrapatu zuten. Eta esprintean, pistan munduko txapeldun izandako Trussov 23 urtekoa nagusitu zitzaion Hushovd beteranoari. Seigarren etapa jokatuko da gaur, Torredembarra eta Bartzelona artean, 150 kilometrokoa. Ez dauka zailtasun handirik.

Sailkapenak

BOSGARREN ETAPA

1. Nikolai Trussov (Katusha) 4.28.58

2. Thor Hushovd (Cervelo) d.b.

3. Fabio Sabatini (Liquigas) d.b.

4. Greg Henderson (Columbia) d.b.

5. Pablo Urtasun (Euskaltel) d.b.

6. Leonardo Duque (Cofidis) d.b

NAGUSIA

1. Alejandro Valverde (Caisse) 13.49.38

2. Daniel Martin (Garmin) 15era

3. Haimar Zubeldia (Astana) 22ra

4. Mikel Astarloza (Euskaltel) 34ra

5. J. A. G. Marchante (Cervelo) 38ra

6. Jakob Fuglsang (Saxo Bank) 45era