Eurokopako partidarik motzena jokatu dute Txekiak eta Greziak, bigarren jardunaldiaren estreinakoan: seigarren minuturako Txekia 0-2 irabazten ari zen, Jiracek eta Pilarren golei esker. Eta Greziak ezer egin al dezake seigarren minuturako 0-2 galtzen joanda? 2004an Eurokopa irabazi zuenekoak beste garai batzuk ziren.
Txekiak arnasa hartu du, lehen jardunaldian Errusiaren kontra 4-1 galdu ondotik. Partida primeran jarri zaio hasieratik bertatik, baina gero pasatu du estutasunik. Izan ere, Cech atezainak gola oparitu dio Greziari 53. minutuan: huts galanta egin du eta Gekasek, 1-2ko gola. Ez da ohikoa Cechek halakoak egitea; duela lau aste batik bat berak eman zion Chelseari Txapeldunen Ligako titulua, final handia eginda.
Dena dela, Txekiak ez du Europako aurreko txapelketetan izandako txispa. Nevdeven-eta atzetik ez da tamainako inor heldu.
Greziari oso zail jarri zaio final-laurdenetarako txartela. Multzoko lehen biak sailkatuko dira kanporaketara, eta bi partidatan puntu bakarra irabazi du. Larunbatean Errusia indartsuaren aurka ariko da. Txekia, berriz, Poloniaren kontra.
0-1: Jiracek (3m). 0-2: Pilar (6m). 1-2: Gekas (53m).
