TXIRRINDULARITZA. ESPAINIAKO VUELTA. Txikiak ere ahal du

David Garciak (Xacobeo Galizia) irabazi zuen atzo EspainiakoVueltako hamabosgarren etapa, eta Ezequiel Mosquera taldekideak herenegun izan zuen egun mingotsari azukre pixka bat bota zion gainetik. Txirrindularitzak ere horrelako kontuak ditu. Mosquerak herenegun etapa irabazteko aukera izan zuen, baina Alberto Contadorrek (Astana) ez zuen gupidarik izan, eta bigarren etapa irabazi zuen jarraian. Alvaro Pino Xacobeo Galiziako zuzendariak amorru handia hartu zuen, Contadorrek Mosquerari irabazten utzi ez ziolako egindako lan bakartiaren ostean. Atzo, berriz, haserrea erabat joan ez bazitzaion ere, pozik egoteko arrazoiak eman zizkion Garciak, etapa irabazita.

Arrain handiak txikia jaten du sarritan, baina batzutan ihes egiteko aukera ematen dio, komeni zaionean. Hori gertatu zen atzo, Vueltako hamabosgarren etapan. Herenegun Contadorrek Mosquera jan zuen, baina atzo ez zuen horren beharrik. Ondorioz, sailkapen orokorrean atzean zeuden txirrindulariek aukera izan zuten beren dohainak erakusteko.

Cudillero eta Ponferrada bitarteko etapa luzea zen, 202 kilometrokoa, baina ez oso gogorra. Txirrindulariek bazekiten egun aproposa zela ihesaldiren bat eratzeko eta ez zuten denbora alferrik galdu. 37 kilometro egin zituztenean lehen ihesaldia antolatu zuten 17 txirrindularik. Horien artean zeuden: Xabier Zandio (Caisse d'Epargne), Jose Luis Arrieta (Ag2r), Mikel Astarloza (Euskaltel Euskadi) eta Juanma Garate (Quick Step). Tropela pixkanaka denbora galtzen joan zen ihes egindako txirrindulariekiko.Oceroko gainaren ostean lehen mugimenduak izan ziren ihes egindakoen artean.

Arrietak erasoa jo zuen helmugara iristeko 30 kilometro gelditzen zirenean, baina ihesaldiko kideek atzeman zuten. Lombilloko hiru kilometroko aldapa gogorrean erasoaldi gehiago izan ziren. Lau txirrindularik tartea irekitzea lortu zuten: Juanma Garate (Quick Step), David Arroyo (Caisse d'Epargne), Nick Nuyens (Cofidis) eta David Garciak (Xacobeo). Nuyens saiatu zen ihes egiten aurrena, baina ez zuen helburua lortu. Helmugara iristeko lau kilometro gelditzen zirenean, Garcia saiatu zen, baita lortu ere. Bakarrik iritsi zen Ponferradako helmugara eta Garate hirugarren sailkatu zen.

Gaurko etapa Ponferradan hasi eta Zamoran bukatuko da, Ibilbideak 186,3 kilometro ditu. Hasi eta gutxira lehen mailako Aceboko gaina igo beharko dute, eta, ondoren, laua izango da, esprinterrentzat egokia.

Sailkapenak

HAMABOSGARREN ETAPA

1. D. Garcia Dapena (Xacobeo) 5.02.27

2. Nick Nuyens (Cofidis) 17ra.

3. Juanma Garate (Quick Step) db.

4. Paolo Tiralongo (Lampre) 33ra.

5. Mikel Astarloza (E. Euskadi) 36ra.

6. D. Arroyo (Caisse d'Epargne) 39ra.

7. Matti Breschel (CSC) 1.38ra.

8. X. Zandio (Caisse d'Epargne) db.

9. P. Gilbert (Française des Jeux) 1.39ra.

NAGUSIA

1. Alberto Contador (Astana) 61.13.48

2. Levi Leipheimer (Astana) 1.17ra.

3. Carlos Sastre (CSC) 3.41ra.

4. E. Mosquera (Xacobeo) 4.35ra.

5. Robert Gesink (Rabobank) 5.49ra.

6. A. Valverde (C. d'Epargne) 6.00ra.

7. J. Rodriguez (C. d'Epargne) 6.11ra.

8. Egoi Martinez (E. Euskadi)8.56ra.

9. D. Moncoutie (Cofidis) 9.32ra.