TXIRRINDULARITZA. Eta ez da azkena izango

Esprintekin gozatzen dutenek ez dute hala denik onartuko, baina ikuskizuna galtzaile ateratzen da Mark Cavendishek (Columbia) dena ondo egiten duenean. Hain erraz egiten du dena, egindako ahalegina bera ezkutuan geratzen da. Ez da batere erraza esprint bat irabaztea, akatsik ez egitea edo taldeak hasi eta bukatu egin behar duen guztia egitea. Baina Cavendishek hiru aldiz egin du hori aurtengo Vueltan-taldekako erlojupekoa ere irabazi zuen Columbiak, Sevillan-. Man uharteko esprinterrak herren egin zuenean gozatu zuten Jauheni Hutarovitxek (Francaise des Jeux) eta Alessandro Petacchik (Lampre). Baina Cavendishek garaipena barruraino sartuta dauka, eta atzo ere nabarmen geratu zen hori, Salamancan. Hiru etapa eskuratu ditu jada, eta, okerrik ezean, beste bat ere irabaziko du, etzi, Madrilen, azken etapan.

Juan Jose Haedo (Saxo Bank), Manuel Cardoso (Footon Servetto), Tyler Farrar (Garmin), Samuel Dumoulin (Cofidis)... Beste maila bateko esprinterrak dira horiek. Edo Cavendish da, horien ondoan, beste maila bateko esprinterra. Matthew Harley Gossek, Cavendishen taldekideak, gogotik bizitu behar izan zuen erritmoa, Quick Stepek hautsi egin zuelako tropel burua. Gossek eman beharrekoak emanda, ohi baino urrutiagotik jo zuen esprinta Cavendishek. Eta hor geratu zen nabarmen Vueltako esprinterren arteko aldea. Bizikleta bateko aldea atera zion Columbiakoak Haedori. Ordurako etsita, atzean geratuta zegoen Koldo Fernandez de Larrea (Euskaltel-Euskadi).

Zortzi laguneko ihesaldia -Pablo Urtasun (Euskaltel-Euskadi) sartu zen bertan, baina 2.40 minuturen aldea izan zuen gehienez- eta Caisse d'Epargneren haize-babes ahalegina, besterik ez zuen eskaini etapak. Sailkapen nagusiko lehen laurek lau segundoren aldea atera zieten faborito gehienei.

Piedrahita eta Toledo artean, Vueltako etaparik luzeena izango dute gaur: 231,2 kilometro. Chia bigarren mailako mendatea igo beharko dute etapa hastearekin batera, eta ihesaldia sortzeko aproposa izango da hasiera hori. Toledoko azken kilometroa, berriz, gogorra da. %6,2ko batez bestekoa dauka azken 200 metroetan sartu aurreko kilometro erdiak.

Garate, Zubeldia eta Erbiti

Jose Luis de Santos Espainiako hautatzaileak atzo jakinarazi zuen zein bederatzi txirrindulari ariko diren Espainiarekin Munduko Txapelketako gizonezkoen errepideko proban. Eta bederatzi horien artean daude Juanma Garate (Rabobank), Haimar Zubeldia (RadioShack) eta Imanol Erbiti (Caisse d'Epargne). Samuel Sanchez ere (Euskaltel-Euskadi) bederatziko horretan dago. Zubeldia 2002an aritu zen, azkenekoz, Munduko Txapelketan, eta Erbitirentzat estreinakoa izango da. Aurten Australian jokatuko da Munduko Txapelketa, eta gizonezkoen errepideko proba urriaren 3an izango da.

Sailkapenak

HEMEZORTZIGARREN ETAPA

1. Mark Cavendish (Columbia) 3.27.11

2. Juan Jose Haedo (Saxo Bank) d.b.

3. Manuel Cardoso (Footon) d.b.

4. Tyler Farrar (Garmin) d.b.

5. Samuel Dumoulin (Cofidis) d.b.

6. Robert Forster (Milram) d.b.

7. Enrique Mata (Footon) d.b.

8. Greg Van Avermaet (Lotto) d.b.

9. Wouter Weylandt (Quick Step) d.b.

10. Danilo Hondo (Lampre) d.b.

29. Juanjo Oroz (Euskaltel) 9ra

40. Mikel Nieve (Euskaltel) d.b.

NAGUSIA

1. Vincenzo Nibali (Liquigas) 74.47.06

2. Ezequiel Mosquera (Xacobeo) 38ra

3. Peter Velits (Columbia) 1.59ra

4. Frank Schleck (Saxo Bank) 3.43ra

5. Joaquim Rodriguez (Katuxa) 3.48ra

6. Xavier Tondo (Cervelo) d.b.

7. Thomas Danielson (Garmin) 3.58ra

8. Nicolas Roche (Ag2r) 4.02ra

9. Carlos Sastre (Cervelo) 4.16ra

10. Luis Leon Sanchez (Caisse) 5.42ra

13. Mikel Nieve (Euskaltel) 9.27ra

33. Amets Txurruka (Eusk.) 43.40ra